Foto:
Esterińizge sala keteıik, 2020 jyly Tokıo Olımpıadasynda Rýslan Qurbanov 1/8 fınalǵa deıin jetip, Qazaqstan tarıhyndaǵy eń úzdik nátıjeni kórsetti. Al 2024 jylǵy Parıj Olımpıadasyna erler quramasy alǵash ret komandalyq joldama alyp, álemniń úzdik 8 komandasy qataryna endi. Jekeleı synda Rýslan Qurbanov shırek fınalǵa deıin jetip, ulttyq rekordty taǵy da jańartqan.
2023 jylǵy álem chempıonatynda Qazaqstan quramasy komandalyq esepte alǵash ret qola medal ıelendi. Al jekeleı básekede Rýslan Qurbanov jartylaı fınalǵa shyqty. 2024 jylǵy Azııa chempıonatynda qazaqstandyq semsershiler 9 jyldan keıin alǵash ret komandalyq sapy boıynsha chempıon atandy. Fınalda olar ataqty Japonııa quramasyn jeńdi. Qylysh baǵdarlamasynda da erler quramasy sensasııalyq túrde qola júlde enshiledi.
Týrızm jáne sport mınıstrliginiń habarlaýynsha, Azııa oıyndarynda qazaqstandyq sapy sheberleri uzaq úzilisten keıin fınalǵa deıin jetken. Qazirgi ýaqytta erler sapy quramasy álemdik reıtıngte 5-orynda, al jekeleı esepte Rýslan Qurbanov 8-orynda tur.
«Búgin semserlesýden ulttyq qurama óz tarıhyndaǵy eń úzdik nátıjege qol jetkizip, álem chempıonatynyń jartylaı fınalyna shyqty. Qazirgi álem chempıony – Italııa quramasyn jeńgen ulttyq qurama ókilderi Kırıll Prohodov, Rýslan Qurbanov, Vadım Sharlaımov jáne Elmır Álimjanov fınal joldamasy úshin Tokıo Olımpıadasynyń chempıony, Parıj Olımpıadasynyń kúmis júldegeri Japonııa sportshylarymen sheberlik baıqasyp, qarsylastaryna az ǵana basymdyqpen jol berip qoıdy», delingen habarlamada.
Aıta keteıik, Qazaqstan endi qola júlde úshin toǵyz dúrkin Olımpıada chempıony Fransııamen kezdesedi. Fransııa bul ataqty 1908, 1924, 1932, 1948, 1980, 1988, 2004, 2008 jáne 2016 jyldary jeńip alǵan.
Týrızm jáne sport mınıstrligi halyqaralyq tájirıbeni engizý, sportshylardyń kásibı deńgeıin arttyrý, medal sanyn kóbeıtý jáne salany jan-jaqty damytý baǵytynda júıeli jumysty jalǵastyryp keledi.
