О́SKEMEN. 17 aqpan. A.S.Pýshkın atyndaǵy oblystyq kitaphana halyqaralyq kitap syılaý kúnin atap ótti. «Jaqsy kóretin kitabymdy sizge syılaımyn!» aksııasy aıasyndaǵy merekede kitaphanaǵa kelýshiler syılyqqa kitap alý múmkindigine ıe boldy. Bul týraly egemen.kz tilshisi habarlady.
Atalǵan sharada oqyrmandar ózderiniń súıikti avtorlary men kitaptary jóninde jan tebirenter pikirlerimen bólisti. Kitaphanaǵa aldymen qala mektepteriniń oqýshylary jınaldy. Olar «Kitap eli» kóńildi-tanymdyq saıahat oıynyna qatysty. Balalar men eresekter kitaptar men shyǵarmalar týraly maqal-mátelder men jumbaqtar aıtyp, túrli ánder oryndady. Sondaı-aq kitaphananyń jas dostary mártebeli kitapqa degen ózderiniń júrekjardy jyly lebizderin arnady. О́ziniń súıikti kitaby jónindegi oıyn sheshendikpen jetkizgen oqyrmandar «Súıikti kitaptar sherýi» aýksıonynda syılyq kitaptarǵa ıe boldy.
Qabıdolla Baltekenov, Nadejda Lıseva, Lıýbov Nıkkel, Úmithan Nurǵalıev, Lıýbov Evstıfeeva syndy kitaphananyń úzdik oqyrmandary ózderiniń kitap oqý erekshelikteri jóninde áńgimeledi. Sonymen birge, qonaqtar papırýs jazbalarynan bastap, elektrondy kitaphanaǵa deıingi ýaqytty qamtyǵan «Mártebeli kitap» zııatkerlik oıynyna qatysty.
Sonymen qatar, kitaphana oqyrmandary oblystyq aýrýhanaǵa baryp, aýrýhananyń qyzmetkerleri men emdelýshilerine kitap syılap, án aıtyp berdi. «100 qaıyrymdy is» atty kitaphana janyndaǵy klýb músheleriniń nazarynan soǵys ardagerleri de tys qalǵan joq. Maıdanger qart A.Kımýsov kitaphananyń arnaıy syılyǵyna ıe boldy.
Dýman Anash.
Derek: egemen.kz
Sýret: A.Pýshkın atyndaǵy oblystyq kitaphana.
