Atalǵan ádis hırýrgtarǵa ómirlik mańyzdy júıke qurylymdarynyń aınalasynda asa dáldikpen áreket etýge múmkindik berip, otadan keıingi nevrologııalyq asqynýlardyń qaýpin edáýir azaıtady. Bul ásirese, fýnksıonaldy mańyzdy aımaqtardaǵy — sóıleý, qozǵalys nemese sezimtaldyqqa jaýapty qurylymdar janynda jasalatyn operasııalar úshin óte mańyzdy.
Neıromonıtorıng mı men julyn isikterinde, sóıleý, qozǵalys pen sezimtal aımaqtar mańyndaǵy jańa túzilisterde, mı dińindegi, talamýs, bazaldy ganglıılerdegi isikterdi, julyn ishindegi (ıntramedýllıarlyq) isikterdi emdeý barysynda qoldanylady.
Sol sııaqty omyrtqa men julyn hırýrgııasynda, skolıoz sııaqty, basqa da omyrtqa qısaıǵanda jasalatyn operasııalarda, julyn isikterin alǵanda, julyn jolaqtaryna zaqym kelý qaýpi joǵary operasııalarda, omyrtqanyń ustamaýyn túzetý, stenoz, jaryq sekildi júıke túbiri nemese julyn qysylǵan jaǵdaılarda kómegi orasan.
«Intraoperasııalyq neıromonıtorıng tek hırýrgııalyq otalardyń dáldigin arttyryp qoımaı, neırohırýrgııalyq qaýipsizdikti jańa sapalyq deńgeıge kóterýge múmkindik beredi. Bizdiń klınıkada bul tehnologııa negizinen omyrtqaǵa jasalǵan otalarda qoldanylyp keledi. Máselen, «spina bifida» dıagnozy sııaqty omyrtqadaǵy lıpoma men kısta sekildi isikterge, túrli deńgeıdegi bekitilgen julyn dıagnozdary bar balalarǵa ota jasaldy. Bul — balalardyń densaýlyǵy tez durystalyp, tolyqqandy ómir súrýine jol ashatyn múmkindik», dedi BShMKO nevrolog-dárigeri, neırofızıolog Patma Hashımova.
Atalǵan ádis Almatydaǵy ortalyqta 2024 jyldyń naýryz aıynan bastap qoldanyla bastady. Osy ýaqyt aralyǵynda ondaǵan balaǵa neırohırýrgııalyq kómek kórsetildi. Barlyq mamandar Astana qalasyndaǵy Ulttyq neırohırýrgııa ortalyǵynda arnaıy kásibı daıarlyqtan ótken.
Operasııalar mýltıdıssıplınarlyq brıgada quramynda júrgiziledi. Bul joly joǵarydaǵy ádispen balaǵa jasalǵan kúrdeli otany neırohırýrgııa bóliminiń meńgerýshisi Ahan Rahym Aıdaruly, neırohırýrg Azamat Nurke, neırofızıolog Patma Hashımova júrgizdi.
Balalarǵa shuǵyl medısınalyq kómek kórsetý ortalyǵy aldaǵy ýaqytta da joǵary tehnologııalyq jáne jekelegen (personalızırovannaıa) neırohırýrgııa baǵytynda damýdy jalǵastyra bermek.
