Semeıde salyq mólsheri nege ózgerdi?

Memlekettik kirister depar­tamenti 2024 jyl úshin jeke tulǵalardyń múlik saly­ǵyn esep­­tegenin jáne tóleý mer­zimi 2025 jyldyń 1 qazanynda aıaqta­latynyn málimdedi. Onda múlik salyǵyn birneshe kórsetkish, sonyń ishinde bir sharshy metrge bazalyq mólsherleme arqyly esepteıdi. Salyq mólsheri múlik ornalasqan eldi mekenge baılanysty bolmaq. Mysaly, Astana, Almaty, Shymkent sııaq­ty res­pýblıkalyq ma­ńyzy bar qala­larda bazalyq quny – bir sharshy metrge 60 000 teńge. 2024 jyldyń 1 qań­­tarynan bastap Salyq ko­deksine jasalǵan birqatar óz­geris kúshine endi. Sóıtip, ob­lys­tyń ákimshilik ortalyq qalalaryna arnaıy bazalyq mólsherlemeler belgilengen. Sol sekildi semeılikterdiń 2024 jylǵa tóleıtin múlik salyǵyna qatysty azdaǵan ózgeris bar.

Bul týraly Abaı oblysy memlekettik kirister depar­ta­men­ti Túsindirý jumystary jáne baılanys ortalyǵy bas­qar­masynyń basshysy Ásem Turly­bekovadan bilgen edik.

«Turǵyn úıdiń bir sharshy metriniń bazalyq quny 12 000 teńgeden 36 000 teńgege deıin ósti. Sonymen qatar jer ýchaskelerine qoldanatyn bazalyq mólsherleme de 0,39 teńgeden 0,58 teńgege artty. Qalanyń jańa mártebesine baılanysty oblystyń ákimshilik ortalyq qalalaryna tıesili ta­­lap­­tar endi Semeıde de engi­zildi», deıdi Á.Turlybekova.

Keńes Odaǵynyń batyrlary, Sosıalıstik Eńbek erleri, mem­lekettik nagrada ıeger­leri, Uly Otan soǵysy­nyń ardagerleri men olarǵa teńestirilgender, tyl eńbekkerleri, jetim balalar men ata-ana qamqorlyǵynsyz qalǵan balalar, densaýlyǵynda ereksheligi bar bala tárbıelep otyrǵan ata-analar, «Batyr ana» nemese «Altyn alqa» ataǵyna ıe kópbalaly analar jáne jalǵyz turatyn zeınetkerler múlik pen jer salyǵynan bosatylady.

О́ndiristik emes tólemder basqarmasynyń bas mamany Erkebulan Núkebaevtyń aıtýynsha, Semeı qalasynyń mártebesi ózgerýine baılanys­ty jańa talaptar engen.

«2024 jylǵa deıin Salyq kodeksinde belgilengen jeńildigi bar azamattar múlik quny jeńil­dik sheginen aspaǵan jaǵdaıda, múlik salyǵynan tolyq bosatylatyn. Alaıda Semeı qalasynyń ákimshilik ortalyq mártebesine ıe bolýyna baılanysty baǵalaý quny artty. Belgilengen shek (1 000 nemese 1 500 AEK – jeńildik túrine baılanysty) asyp ketken jaǵdaıda artyq somaǵa salyq esepteledi», deıdi ol.

Sonymen qatar keı azamattar bazalyq qunnyń 12 000-nan 36 000 teńgege ósýi salyqty 3 ese arttyrady dep qate túsinýi múm­kin. Salyq mólsheri múlik­tiń baǵalaý qunyna qaraı ósý tár­tibimen qoldanatyn kórsetkish negizinde esepteledi. Sondyqtan árbir jaǵdaıda jeke esep júr­giziletinin nazarǵa alý kerek. Múlik jáne jer salyǵyna be­re­shek bolǵan jaǵdaıda máj­­búrlep óndirip alý sharalary baryn da umytpaǵan jón. Sa­lyq somasyndaǵy ózgeristerdi «e-Salyk Azamat» mobıldi qosym­shasynan, kgd.gov.kz saıty­nan, «Kaspi.kz» jáne «Homebank» qosymshalarynan bilýge bolady.

Abaı oblysy