Kólik qyzmeti eldiń ónerkásiptik, tehnologııalyq áleýetin nyǵaıtýda, óńiraralyq, halyqaralyq baılanystardy damytýda úlken ról atqarady. О́ndiris, saýda, aýyl sharýashylyǵy, qyzmet kórsetý, logıstıka sııaqty sektorlardyń damýyna tikeleı áser etedi. Halyqtyń ómir súrý sapasy kóbinese osy salanyń senimdi, úzdiksiz jumys isteýine baılanysty.
Qazirgi tańda elimizdiń kólik kesheni qýatty óndiristik, ǵylymı-tehnıkalyq, kadrlyq áleýetke ıe. Sala qyzmetkerleriniń kúndelikti tynymsyz eńbeginiń, kásibıliginiń, iske jaýapkershilikpen qaraýynyń arqasynda keshendi jańǵyrtý, jolaýshylarǵa qyzmet kórsetý sapasyn arttyrý, júkterdi jetkizý, qyzmetter men jumystardyń aıasyn keńeıtý, kólik ınfraqurylymyn jetildirý, ozyq tehnologııalar engizý, óńirlik, halyqaralyq baılanystardy nyǵaıtý, qozǵalys qaýipsizdigin qamtamasyz etý jónindegi maqsat-mindetter barynsha oıdaǵydaı júzege asyrylyp keledi.
Jaqsy damyǵan kólik ınfraqurylymy – sheteldik, otandyq ınvestorlar úshin de tartymdy faktor. Ol óndiristi keńeıtýdi jeńildetedi, taýar men qyzmet aınalymyn qamtamasyz etedi, myńdaǵan adamdy jumyspen qamtıdy. Qala men aýyl, aımaqtar men elder arasyndaǵy ekonomıkalyq qatynasty nyǵaıtady. Ishki naryqty biriktirip, ekonomıkalyq teńgerimdi qamtamasyz etedi.
Sala qyzmeti temirdeı tártipti, joǵary jaýapkershilikti talap etedi. Osy turǵyda kún-tún demeı, aptap ystyqqa, qaqaǵan sýyqqa qaramaı, qoǵam ómiriniń barlyq salasynda eseli eńbektiń kórigin qyzdyryp, el ekonomıkasyna eselep úles qosyp júrgen beınetkesh qaýym qandaı qurmet, maqtaýǵa bolsyn laıyq.
Kólik qyzmetkerleriniń búgingideı «adal azamat» uǵymy qadirli qundylyqtarymyzdyń biri retinde aldyńǵy qatarǵa shyǵyp, jumysshy mamandyqtar keńinen nasıhattalyp jatqan kezeńde mán-mańyzy tipten arta túsedi. Bir sózben, kólik ınfraqurylymy – ekonomıkanyń draıveri, eldiń tynys-tirshiliginiń negizgi kórsetkishi. Demek ony damytý barsha baılyqty, resýrstardy tıimdi paıdalaný, halyqtyń ál-aýqatyn arttyrýdyń birden-bir joly, kózi bolyp qala beredi.
