Qyrǵyzstan basshysy ekijaqty formattaǵy odaqtastyq baılanystar men strategııalyq seriktestiktiń tereńdep kele jatqanyn qanaǵattanýshylyqpen atap ótip, kópjaqty alańdardaǵy qazaq-qyrǵyz yntymaqtastyǵynyń dástúrli joǵary deńgeıin erekshe atap ótti. Kezdesý barysynda elimizdiń Syrtqy ister mınıstri Prezıdent Qasym-Jomart Toqaevtyń izgi tilegi men sálemin jetkizdi.
Sóz arasynda mınıstr elimizdiń baýyrlas Qyrǵyzstanmen odaqtastyq qatynastardy jan-jaqty nyǵaıtýǵa jáne keńeıtýge baǵyttalǵanyn rastaı otyryp, ekijaqty kópqyrly yntymaqtastyqtyń qazirgi jaǵdaıy men keleshegi týraly habardar etti. Buǵan qosa Qazaqstan Prezıdentiniń Qyrǵyzstanǵa josparlanǵan resmı saparyna daıyndyq jumystarynyń negizgi aspektilerin talqylady.
Kezdesý sońynda Qyrǵyzstan Prezıdenti Sadyr Japarov eki el arasyndaǵy qarym-qatynastardy oń baǵalap, mazmundyq turǵyda odan ári damytýǵa múddeli ekenin bildirdi.
Murat Nurtileý resmı sapary aıasynda Qyrǵyz Respýblıkasynyń Syrtqy ister mınıstri Jeenbek Kýlýbaevpen de kezdesti. Taraptar eki el arasyndaǵy tyǵyz yntymaqtastyqtyń qarqyndy damyp kele jatqanyn atap ótti. Sondaı-aq ol áńgimelesý barysynda Memleket basshylarynyń saıası erik-jigeriniń arqasynda qazaq-qyrǵyz qatynastary ózara is-qımyldyń jańa sapaly deńgeıine kóterilgenin aıtty.
«Qazaqstan baýyrlas Qyrǵyzstanmen ózara qurmet, senim jáne múddelerdi eskerý qaǵıdattaryna negizdelgen odaqtastyq qatynastardy tereńdetýge berik beıildi. Biz uzaqmerzimdi seriktestikti qurýda osy maqsattardy basshylyqqa alamyz», dedi M.Nurtileý.
Syrtqy saıası vedomstvolar basshylary keıingi jyldary joǵary deńgeıde qol jetkizilgen ýaǵdalastyqtardyń iske asyrylý barysyn jan-jaqty talqylady, sondaı-aq parlamentaralyq, úkimetaralyq jáne óńiraralyq baılanystardy nyǵaıtýǵa járdemdesýge daıyn ekenin bildirdi.
Basqosýda Prezıdent Qasym-Jomart Toqaevtyń Qyrǵyzstanǵa resmı saparyna jáne eki el arasyndaǵy Joǵary memleketaralyq keńestiń jetinshi otyrysyn ótkizýge daıyndyq máselelerine erekshe nazar aýdaryldy. Taraptar saýda-ekonomıkalyq yntymaqtastyqty keńeıtý keleshegin de talqylady.
Memleket basshylarynyń tapsyrmalaryn júzege asyrý aıasynda mınıstrler ekonomıkalyq ózara is-qımyldy tereńdetýge, ózara saýda kólemin 3 mlrd AQSh dollaryna deıin arttyrýǵa jan-jaqty járdemdesýge ýaǵdalasty. О́tken jyldyń qorytyndysy boıynsha Qazaqstan men Qyrǵyzstan arasyndaǵy taýar aınalymy 1,7 mlrd AQSh dollaryn qurady. Jalpy, Qazaqstan Qyrǵyzstannyń eń iri úsh saýda seriktesiniń qataryna turaqty túrde kiredi.
Jıynda 2026 jyly qazaq-qyrǵyz memlekettik shekarasynda Indýstrııalyq saýda-logıstıkalyq keshen jobasynyń iske qosylýy, birlesken ınvestısııalyq jobalardy pysyqtaý mańyzdy ekeni tilge tıek etildi. Mınıstrler yntymaqtastyqtyń eleýli áleýetin atap, energetıka, kólik, logıstıka, sý qatynastary jáne aýyl sharýashylyǵy salalarynda ózara tıimdi is-qımyldy damytýǵa daıyn ekenderin bildirdi.
Eki memleket arasyndaǵy berik jáne uzaqmerzimdi qatynastardyń negizine aınalǵan mádenı-gýmanıtarlyq baılanystardy tereńdetý máseleleri jeke qaraldy. Byltyr elimizde Qyrǵyzstan mádenıetiniń kúnderi jáne aýqymdy is-sharalar sátti ótken edi. Bıyl Memleket basshysynyń Qyrǵyzstanǵa resmı sapary qarsańynda Qazaqstan kınosy kúnderin, úshinshi qazaq-qyrǵyz jastar forýmyn ótkizý, sondaı-aq Bishkekte «Altyn dostyq kópiri» eskertkishin saltanatty ashý josparlanǵan.
Kezdesý barysynda mınıstrler óńirlik jáne halyqaralyq kún tártibindegi ózekti máseleler boıynsha «saǵattaryn teńestirdi». BUU aıasyndaǵy tyǵyz ózara is-qımylǵa, sondaı-aq eki memlekettiń halyqaralyq bastamalaryn ilgeriletýde ózara qoldaý kórsetýge beıildilik rastaldy.
Kelissózder qorytyndysy boıynsha Qazaqstan men Qyrǵyzstan SIM basshylary Joǵary memleketaralyq keńestiń jetinshi otyrysynyń «Qazaqstan Respýblıkasy men Qyrǵyz Respýblıkasy arasyndaǵy 2025–2027 jyldarǵa arnalǵan yntymaqtastyqtyń keshendi josparyn bekitý týraly» sheshimin jáne Yntymaqtastyqtyń keshendi josparyn dáıektedi.
