2025 jyldyń alǵashqy aılarynda baıqalǵan qysqamerzimdi aýytqýlarǵa qaramastan, 6 aıdaǵy ınvestısııalyq kiris shamamen 350,7 mlrd teńgege jetti. QRUB basqaratyn, mindetti, mindetti kásiptik, erikti jarnalar esebinen qalyptastyrylǵan zeınetaqy aktıvteriniń kiristiligi 2024 jylǵy shildeden bastap 2025 jylǵy maýsymǵa deıingi keıingi 12 aıda 12,22%-dy qurady, ınflıasııa 11,8% boldy. JMZJ-nyń keıingi 12 aıdaǵy tabystylyǵy – 12,15%.
Neǵurlym uzaq kezeńdi qarastyrar bolsaq, orta, uzaq merzim ishinde zeınetaqy jınaqtarynyń jınaqtalǵan ınflıasııa deńgeıinen asatyn oń, naqty kiristiligi qamtamasyz etiledi. Máselen, 1998 jyly jınaqtaýshy zeınetaqy júıesi qurylǵan sátten bastap 2025 jylǵy 1 shildege deıin jınaqtalǵan ınvestısııalyq kiristilik 996,28%-dy qurady. Búkil kezeńdegi ınflıasııa 892,73%-ǵa teń.
Keltirilgen sandar zeınetaqy aktıvteriniń jekelegen qysqamerzimdi kezeńderdegi kiristiligi olardy basqarý tıimdiliginiń kórsetkishi bola almaıtyndyǵyn kórsetedi. О́ıtkeni qysqa merzim ishinde eseptelgen qarjy quraldary, basqa operasııalar boıynsha syıaqy túrindegi kirister árdaıym osy kezeńdegi baǵaly qaǵazdar men valıýta baǵamdarynyń ózgerýin jaba bermeıdi. Sondyqtan ınvestısııalyq kiristi obektıvti baǵalaýdy kem degende bir jyl ishinde júrgizgen jón.
Elimizde ınflıasııa deńgeıi eskerile otyryp, mindetti zeınetaqy jarnalarynyń saqtalýyna biregeı kepildik beriledi. Salymshynyń tólemge quqyǵy bastalǵan kezde jınaqtalǵan kiristiligine keri áserin tıgizgen jekelegen kezeńderdegi kiristiliktiń tómendeýi jaǵdaıynda aıyrmanyń ótemaqysyna memleket kepildik beredi. Zeınetaqy aktıvterin ınvestısııalyq basqarý men esepke alý júıesi tolyqtaı ashyq. Árbir salymshynyń enpf.kz saıtyndaǵy nemese uıaly qosymshadaǵy jeke kabınetinen óziniń ınvestısııalyq kirisin kórýge múmkindigi bar.
