Atyraý oblysy boıynsha memlekettik kirister departamenti dármensiz boryshkerlermen jumys basqarmasynyń bas mamany Shuǵa Janshaevanyń deregine qaraǵanda, qazir 300 ótinish qaralyp jatyr.
«Bankrot bolýdy qalaǵan 3 myń adamnyń ótinishi zań talaptaryna sáıkes kelmedi. Sol sebepten, olardyń ótinishi qaraýsyz qaldyryldy. Bankrottyq rásimge ótinish berý úshin bereshek somasy 1600 aılyq eseptik kórsetkishten – shamamen 6,3 mln teńgeden aspaýy tıis. Qaryzdyń ótelmegenine keminde 12 aı ótýi, boryshkerdiń turaqty tabysynyń bolmaýy mańyzdy sharttardyń biri sanalady. Jyl basynan beri 71 jeke tulǵa sottan tys bankrot dep tanyldy», deıdi Shuǵa Janshaeva.
Onyń aıtýynsha, bankrot dep tanylǵandardyń birneshe sebebi bar. Birinshiden, basym bóligine jumyssyzdyq áser etken. Ekinshiden, turaqty tabystyń bolmaýynan qaryzyn óteı almaǵan. Úshinshiden, nesıe júktemesi artyp, qarjylyq qıyndyqqa tap bolǵan.
«О́tinishi arnaıy talaptarǵa saı kelmegender endi úsh aıdan keıin qaıta tapsyra alady. Bankrot dep tanylǵan jeke tulǵalar aldaǵy bes jylda bankter men mıkroqarjy uıymdarynan nesıe almaıdy. Olardyń qarjylyq jaǵdaıy úsh jyl boıy baqylaýda bolady», dep málim etti Shuǵa Janshaeva.
