Kesh barysynda kúı óneriniń darabozy, Memlekettik syılyqtyń laýreaty Seken Turysbekovtiń syrly sazdy, tereń fılosofııalyq mazmunǵa toly kúı tolǵaýlary oryndalyp, kórermendi kórkem sezimge bóledi. Kúı kerýeni hakim Abaıdyń óleńderimen órnektelip, Seken ánderimen árlendi. Kúı men poezııa, án men áńgime ushtasqan keshke kórermen yqylasy erekshe boldy.
– Abaı toıy bastalǵan kúnnen bastap «Aq jaýyn» kameralyq orkestrimen birge Abaı oblysynyń Maqanshy, Úrjar, Aıagóz aýdandarynda konsert qoıyp keldik. Bir qyzyǵy, «Aq jaýyn» orkestri barǵan aýdandardyń bárinde aq jaýyn boldy. «Aq jaýyn – Allanyń nury» deıtin ájelerimiz. Taǵy bir aıta keter jaıt, oblys ákimi Berik Ýálıdiń usynysymen oblystyq telearnada aýa raıy baǵdarlamasynyń fonyna «Aq jaýyn» kúıin beripti. Qytaıdaǵy qazaq telearnalarynda da «Aq jaýyn» kúıi beriletinin kórgem. Sodan ba, keıbir kisiler «Aýa raıyn» tartyp berińizshi deıtin bolypty», dep aǵynan jaryldy kúıshi.
Kúı keshine kóptep jınalǵan oblys turǵyndary men qala qonaqtary, jalpy ónersúıer qaýym bekzat ónerge shynaıy rızashylyqtaryn jetkizip, qaıta-qaıta shatyrlaǵan qoshemet bildirdi.
«Aq jaýyn» memlekettik kameralyq orkestri dástúrli saz óneri men zamanaýı klassıkany sheber ushtastyryp, Abaı shyǵarmalaryna arnalǵan mýzykalyq ınterpretasııalardy joǵary deńgeıde oryndady. Orkestr repertýaryndaǵy árbir shyǵarma kórermenge tereń oı salyp, áserli áýen tyńdaýshy júregine ásem iz qaldyrǵany sózsiz.
Abaı oblysy
