Úzdik geograftar
О́tken aptada ozat oqýshylarymyz IGeO–2025 halyqaralyq geografııa olımpıadasynda tarıhı jetistikke qol jetkizip, tórt medaldy jeńip aldy. Taılandta ótken bul baıqaýdyń nátıjesinde bizdiń balalar eki altyn, eki kúmis medaldy oljalap, atalǵan saıysqa qatysqan 47 memlekettiń arasynda jalpykomandalyq esepte ekinshi oryndy ıelendi.
Bul – úlken jetistik. Qaraǵandy oblysyndaǵy Nazarbaev zııatkerlik mektebiniń 12-synyp oqýshysy Talǵat Baıbosynov pen Qostanaı oblysyndaǵy Nazarbaev zııatkerlik mektebiniń 10-synyp oqýshysy Andreı Enbahtov altynnan alqa taqsa, Aqtóbe oblysyndaǵy Nazarbaev zııatkerlik mektebiniń 12-synyp oqýshysy Álıhan Qalmaǵambetov pen Jetisý oblysyndaǵy Nazarbaev zııatkerlik mektebiniń 12-synyp oqýshysy Bolat Aqjol kúmis medalǵa qol jetkizip, el mereıin asqaqtatty. Olarǵa jetekshilik etken – Halyqaralyq, respýblıkalyq olımpıadalardyń jeńimpazdary Abaı Dúısen men Rýstam Ýálıev. Saıystyń barlyq kezeńine ulttyq quramany daıyndaýdy Respýblıkalyq ǵylymı-praktıkalyq «Daryn» ortalyǵy uıymdastyrdy.
Aıta keteıik, Qazaqstan IGeO olımpıadasyna 2012 jyldan beri qatysyp keledi. Osy ýaqyt aralyǵynda bizdiń oqýshylar 5 altyn, 4 kúmis jáne 7 qola medaldy jeńip alǵan.
Informatıka myqtylary
Bolıvııanyń Sýkre qalasynda ótken IOI–2025 halyqaralyq ınformatıka olımpıadasynda ozat oqýshylarymyz tórt medalǵa qol jetkizip, 87 memlekettiń arasynan jalpykomandalyq esepte 14-orynnyń tuǵyrynan kórindi.
Eki kezeńniń qorytyndysynda Qazaqstan quramasy úsh kúmis, bir qola medaldy qanjyǵalady. Atap aıtar bolsaq, Semeı qalasyndaǵy Nazarbaev zııatkerlik mektebiniń 11-synyp oqýshysy Ákejan Asqar, Almaty qalasyndaǵy fızıka-matematıka mektebiniń 11-synyp oqýshysy Maksım Soı, Qyzylorda oblysyndaǵy «Bilim-ınnovasııa» lıseıiniń 10-synyp oqýshysy Mansur Mamadahýnov ekinshi orynǵa ıe bolsa, Almaty qalasynyń №165 mamandandyrylǵan mektep-lıseıiniń 9-synyp oqýshysy Daýjan Beketov qola medalǵa qol jetkizdi. Qurama jetekshileri – Astana IT University-diń bas jattyqtyrýshysy Temirlan Satylhanov jáne Almaty IITU ýnıversıtetiniń sporttyq baǵdarlamalaý boıynsha jattyqtyrýshysy Aıbar Qýanyshbaı.
Aıta keteıik, Informatıkadan halyqaralyq olımpıada (IOI) alǵash ret 1989 jyly Bolgarııada ótkizildi. Ulttyq qurama bul bedeldi jarysqa 1998 jyldan turaqty túrde qatysyp keledi. Osy ýaqyt aralyǵynda bizdiń oqýshylar barlyǵy 75 medaldy jeńip aldy.
