Is-sharaǵa «Ǵylym ordasy» RMK bas dırektory Ular Muqajanov, Iran Islam Respýblıkasynyń Almatydaǵy Bas konsýly Sýna Ahmadı, Iran Mádenı ókildiginiń basshysy Hosseın Aǵazade, sondaı-aq Irandaǵy qazaq dıasporasynyń ókilderi, zııaly qaýym men ǵalymdar qatysty.
Halyqaralyq sharanyń basty maqsaty – Abaı Qunanbaıulynyń rýhanı-mádenı murasyn dáriptep, onyń tereń mazmundy shyǵarmalary men adamzattyq qundylyqtarǵa negizdelgen ıdeıalaryn halyqaralyq deńgeıde nasıhattaý. Sonymen qatar, bul mádenı bastama qazaq jáne ıran halyqtary arasyndaǵy ádebı baılanysty nyǵaıtyp, eki el arasyndaǵy mádenı yntymaqtastyqty jańa deńgeıge kóterýge baǵyttalǵan.
Is-shara barysynda «Ǵylym ordasy» RMK bas dırektory Ular Muqajanov:
«Abaı Qunanbaıulynyń 180 jyldyǵy – onyń rýhanı jáne ádebı murasyn jańa qyrynan tanyp, zerdeleýge múmkindik beretin mańyzdy kezeń. Abaı – qazaq jazba ádebıetiniń negizin qalaýshy ǵana emes, ulttyq oı-sana men mádenıettiń sımvoly. Búginde Abaı shyǵarmalary ádebıettanýmen qatar, fılosofııa, tarıh, til bilimi jáne mádenıettaný salalarynda keńinen zerttelip keledi. Osy oraıda, Ǵylym ordasy Ortalyq ǵylymı kitaphanasynyń qorynda saqtalǵan sırek basylymdar men qoljazbalar – úlken ǵylymı mańyzǵa ıe. Bul materıaldar Abaı stılin, jazba tiliniń damýyn jáne shyǵarmalarynyń taralýyn zertteýge mol múmkindik beredi», dep atap ótti.
Sonymen qatar, Abaı murasyn parsy tiline aýdarǵan belgili jazýshy Qajy Muhammed Shadkamdy eske alý keshi ótti. Qajy Muhammed Shadkam – parsy ádebı tilin jetik meńgergen, Abaıdyń óleńderi men eńbekterin parsy tiline aýdaryp, qazaq ádebıetin Iran jurtshylyǵyna keńinen tanytqan kórnekti tulǵa. Onyń eńbegi eki el arasyndaǵy mádenı dıalogty nyǵaıtqan mańyzdy aýdarma retinde joǵary baǵalanady.
Kesh barysynda uly aqynnyń óleńderi qazaq jáne parsy tilderinde oqylyp, Ǵylym ordasynyń sırek kitaptar qoryndaǵy Abaı shyǵarmalarynyń túrli basylymdary, parsy tiline aýdarmalary, 500 bettik «qazaqsha-parsysha» sózdik, sondaı-aq «Abaı – Rýdakı» dostyq kilemi men Temirbek Júrgenov atyndaǵy Qazaq ulttyq óner akademııasy stýdentteriniń týyndylary kópshilik nazaryna usynyldy. Sonymen qatar, Abaıdyń 180 jyldyǵyna arnalǵan mánerlep oqý baıqaýynyń jeńimpazdary marapattalyp, arnaıy syılyqtar tabystaldy.
Shara sońynda taraptar qazaq-ıran ádebı baılanysyn nyǵaıtýǵa nıet bildirip, mundaı mádenı kezdesýlerdiń jıi ótkizilýiniń mańyzdylyǵyn atap ótti.
