Statıstıkaǵa súıensek, 2025 jyldyń alǵashqy jartyjyldyǵynyń ózinde Qazaqstanda 7,9 mln sharshy metr turǵyn úı paıdalanýǵa berildi. Onyń ishinde 2,7 mln sharshy metr – jeke turǵyn úıler bolsa, 5,2 mln sharshy metr – kóp páterli turǵyn úılerge tıesili. Bul – qurylysshylardyń tynymsyz eńbeginiń naqty nátıjesi.
Sońǵy alty jylda (2019–2024 jj.) paıdalanýǵa berilgen turǵyn úı kólemi 97,9 mln sharshy metrdi qurady. Bul kórsetkishtiń 40%-y jeke qurylys, al qalǵany kóp qabatty turǵyn úıler. Memlekettik baǵdarlamalardyń da úlesi az emes. Tek 2025 jyldyń birinshi jartyjyldyǵynda ǵana 7 156 qazaqstandyq otbasy baspanaly bolyp, qonys toıyn atap ótti. Olardyń qatarynda kópbalaly otbasylar, múgedek jandar, jetim balalar bar.
Bizdiń búgingi keıipkerimiz Dýlat Tólenuly qurylys salasyna stýdent kezinde kelgen.
«Qurylys salasynda 2009 jyldan bastap jumys isteımin. Stýdent bolyp júrgen kezde, jazǵy demalysta qosymsha aqsha tabaıyn dep qurylysqa kelgenmin. Sol sátten bastap qurylysta júrgenime 16 jyl bolypty», dep bastady áńgimesin Beısenbaev Dýlat Tókenuly.
Armatýra salasyn ıgergen Dýlat Joǵary oqý ornynda múldem basqa mamandyq boıynsha bilim alǵan. Alaıda, qazirgi tańda qurylys salasyndaǵy eńbeginiń jemisin kórip otyr. Ol elimizdege eń iri nysandardyń qurylysyna, sonyń ishinde - álemdik deńgeıde boı kótergen «Almaty arena» nysanynyń qurylysyna tolyq qatysqan. Al, búgingi kúni Almaty qalasyndaǵy Qalqaman metro stansııasynyń qurylysynda eńbek etip júr.
Qurylys – bizdiń otbasylyq kásibimiz
Eń qyzyǵy, bul salada jalǵyz Dýlat emes onyń aǵasy Dáýlet Beısenbaev ta jumys isteıdi, ıaǵnı, buny otbasylyq kásip desek te artyq etpes.
«Men temir-beton qurylymdarynyń armatýralaryn pishinge keltirý jáne olardy tıisti jerine ornatamyn. Qaramaǵymyzda 12-15 qurylysshy bar. Qurylys biz úshin otbasylyq eńbek kózi. Meniń aǵam - Beısembaev Dáýlet Tólenuly da osy qurylys salasynda júr. Qurylys – tek qara jumys emes. Biz jobamen jumys isteımiz. Qujat qarap, naqty ólshemmen, syzbamen jumys jasaý – úlken jaýapkershilikti talap etedi», deıdi ol.
Onyń aıtýynsha, bul sala bilim men tózimdilikti qajet etedi. Eń basty nazarda – úılerdiń sapaly qurylysy.
«Zaman talabyna saı qural-saımandar da damyp keledi. Qazirgi sát - tehnologııanyń bir orynda turmaı, damyp jatqan zamany ǵoı. Al armatýra men monolıt beton ózgerissiz júredi, sebebi, seısmıkalyq jaǵynan jer silkinisne tótep beredi», deıdi Dýlat Tólenuly.
Qurylysshylar – el damýynyń negizi
Qurylysshy – kúnniń aptap ystyǵyna da, qystyń qaqaǵan aıazyna da qaramaı eńbek etetin, qoǵam tirshiliginiń naǵyz tiregine aınalǵan maman. Olardyń jumysy — syrt kózge qarapaıym kóringenimen, shyn máninde, árbir qabyrǵada, árbir irgetasta solardyń mańdaı teri men taban aqysy jatyr.
Búgingi tańda el ishindegi jańa úıler, mektepter, aýrýhanalar men joldar – bári de qurylysshylardyń tynymsyz eńbeginiń jemisi. Olar tańmen talasa turyp, kesh batqansha beton aralastyryp, temir baılap, qalyp quryp júredi. Qoǵam damýynyń negizi sanalatyn ınfraqurylym solardyń qolymen boı kóteredi.
Qurylysshynyń eńbegi – bul jaı ǵana jumys emes, urpaqqa mıras bolatyn turaqtylyqtyń, qaýipsizdiktiń, jáne jaıly ómirdiń negizi. Sondyqtan bul mamandyq ıelerine degen qurmet árqashan joǵary bolýǵa tıis.
