Jasóspirimderge arnalǵan jazǵy lager

Lagerdiń alǵashqy kúni Mártók aýdanyna arnaldy. Aqtóbe qalasynan arnaıy avtobýspen jolǵa shyqqan balalar eń aldymen Qazaqstan-Reseı shekarasyndaǵy «Jaısań» ótkizý beketine aıaldady. Munda balalar shekarashylardyń jumysyn syrttaı baqylap, ótkizý beketindegi jolaýshylardyń qujattaryn tekserý tártibin kórip, memlekettik shekara qyzmetiniń mańyzdylyǵyn uǵyndy. Osydan keıin Mártók aýdandyq tótenshe jaǵdaılar bóliminiń ǵımaratyna kelip, qaýipsizdik erejesin saqtaý sharalary jóninde qyzmetkerlerdiń dárisin tyńdady. Bul jerde árbir adamnyń qarapaıym turmystyq erejelerdi saqtaý mańyzdylyǵy túsindirildi. Sonyń ishinde jazǵy órtterdiń tutaný sebepterine qatys­ty mol maǵlumat berildi. Sapar maral ósiretin «Zárý» sharýashylyǵyna jal­­ǵasty. Munda maral múıiziniń qasıet­­­teri túsindirilip, pantoortalyqta óńirdegi emdik týrızmniń damýy jóninde dáris tyńdaldy. Keshkisin lager qatysý­shylary «Kazanka» sýqoımasy jaǵa­laýyn­da tynyǵyp, tabıǵat aıasynda ýaqyt ótkizdi. Bul – demalys sáti ǵana emes, sonymen birge alǵan aqparattardy eske túsirip, ózara oı bólisetin alań boldy. Mártók aýdanyna sapar «Aıs» sút ta­ýarly fermasyndaǵy sharýashylyqtyń jumysymen tanysýmen aıaqtaldy.

Kelesi kún balalar Qarǵaly aýdanyna saparǵa shyqty. Olar Qarǵaly ózeniniń boıynda ornalasqan «Trout Kargaly» forel ósiretin sharýashylyqta bolyp, aýyl kásipkerliginiń damý barysymen tanysty. Ásem tabıǵat aıasynda jastardyń bir toby «IQ joryqqa» ıntellektýaldy oıynyna qatyssa, ekinshi toby ózen jaǵasynda sýret salýmen shuǵyldandy. Úsh kúndik sapardyń qorytyndysy Aqtóbe qalasyndaǵy «Solnechnyı» demalys bazasynda jalǵasty. Bul jerde oblystyq prokýratýra men ishki ister organdarynyń qyzmetkerleri jasóspirim­­der­ge quqyqtyq mádenıetti saqtaý, zań aldyndaǵy jaýapkershilik, mamandyq tańdaýǵa qatysty keńester berip, olardy tolǵandyrǵan saýaldarǵa jaýap berdi. Kezdesý sońy arnaıy polısııa jasaǵy jaýyngerleriniń jattyǵýymen qorytyn­dylandy. Balalar arnaıy jasaq jaýyn­­geri bolý úshin qandaı daǵdylardy meńgerý qajettigi jóninde kóp suraq qoıdy.

«Úsh kúnge sozylǵan «Aqtobe camp-2025» jobasy úlken ómirge qadam basqan jastyń ómirlik daǵdylaryn qalyp­­­tas­tyrýǵa yqpal etken is-shara boldy. Balalar tabıǵat aıasynda saıahat­­taı júrip, tártip pen tárbıe, qorshaǵan ortaǵa degen jaýapkershilik, quqyqtyq mádenıet týraly keńester aldy. Túrli kásip ıelerimen ótken árbir kezdesý jasóspirimderdiń bolashaqtaǵy mamandyq tańdaýyna jol ashady dep oılaımyn. Bul jaǵynan Memleket basshysy Qasym-Jomart Toqaevtyń Ulttyq quryltaı jıynynda «Jastarǵa ulttyq qundylyqtardy dáriptep, olarǵa durys baǵyt-baǵdar berý – el bolashaǵy úshin asa mańyzdy. Quqyq buzýshylyqpen kúres tek jazalaýmen emes, tárbıemen, túsindirýmen bastalýy qajet», degen ustanymyn nazarǵa ala otyryp, osy baǵytta jastar arasyndaǵy jumystardy kúsheıtken jón. Tamyzdyń tamasha kúnderi elý balaǵa osyndaı qýanysh syılady. Aldaǵy ýaqytta jas­­óspirim­­­derge arnalǵan jazǵy lager jumy­­syn osyndaı baǵytta jandandyrsaq degen oıdamyz. Jastarymyz týǵan jerdiń tabıǵatyn aıalaý, adal eńbek etý, unatqan mamandyǵyńmen elge paıda tıgizý sııaqty qaǵıdattardy basshylyqqa alsa, sanaly urpaq qalyptastyrýdaǵy memlekettik saıa­sattyń baǵdary durys bolyp jat­qanyn kórsetedi», deıdi oblystyq jastar saıasaty máseleleri basqarmasynyń basshysy Álimbek Turalıev.

Aqtóbe oblysy