Is-shara Abaı Qunanbaıulynyń shyǵarmashylyq murasyn nasıhattap, jas urpaqty rýhanı-mádenı tárbıege baýlýǵa baǵyttaldy. Aqynnyń ónegeli ómiri men tereń oı-tolǵamdary keńinen qamtylǵan keshti QR Memlekettik ortalyq mýzeıi dırektorynyń mindetin atqarýshy Serjan Sarov ashyp, Abaı murasy urpaq tárbıesindegi sarqylmas qazyna ekenin atady.
«Dáýirlerdi jiktegen danyshpannyń toıy týraly Memleket basshysy Qasym-Jomart Toqaev Qazaqstan halqyna arnaǵan jańajyldyq quttyqtaýynda: "Uly Abaıdyń 180 jyldyq mereıtoıyn laıyqty atap ótýimiz kerek" dep tapsyrma bergen bolatyn. Osyǵan oraı elimizde ǵylymı konferensııalar, ádebı baıqaýlar, mádenı is-sharalar uıymdastyrylyp jatyr. Bul – Abaıdyń amanatyna adaldyqtyń, rýhanı sabaqtastyqtyń aıqyn belgisi. Búgingi kesh – sonyń jarqyn úlgisi», – dedi Serjan Sarov.
Kesh barysynda Abaı atyndaǵy Qazaq ulttyq opera jáne balet teatrynyń ártisteri T. Kúzembaev, S. Maqsat, D. Dılıara, B. Qanaǵatov, A. Bekzat, M. Erlanova, M. Samatov jáne Sh. Nurǵalıulynyń oryndaýyndaǵy ánder men sahnalyq qoıylymdar kórermenge rýhanı áser syılap, Abaı álemine tereń boılaýǵa múmkindik berdi.
Sonymen qatar kesh aıasynda Abaı Qunanbaıulynyń 180 jyldyq mereıtoıyna arnalǵan qalalyq baıqaýdyń jeńimpazdary usynǵan kórme kópshilik nazaryna usynyldy. Kórmede oqýshylardyń uly aqyn shyǵarmashylyǵyna arnalǵan sýretteri men qoldanbaly óner týyndylary qoıyldy. Árbir týyndy — Abaı tulǵasyna degen tereń qurmet pen shabyttyń kórinisi boldy.
Memlekettik ortalyq mýzeı bastamashy bolǵan taǵylymdy shara - uly Abaı murasynyń máńgilik ekendigin taǵy bir márte dáleldep, onyń rýhanı-adamgershilik ósıetteriniń búgingi urpaq úshin mańyzyn aıqyndaı tústi.
