Uly oıshyldyń mereıtoıyna arnalǵan merekelik keńistik mýzykalyq, ádebı, teatr, beıneleý óneri jáne qolóner alańdaryn biriktirip, qalanyń ortalyǵyn qazaq mádenıetiniń tiri ensıklopedııasyna aınaldyrdy.
Tańerteńnen bastap arbat boıyndaǵy alańdarda túrli is-sharalar ótti. Kelýshiler poezııadan bastap, vokaldyq baıqaýdyń sońǵy akkordyna deıingi mádenı baǵdarlamany tamashalady.
– Prezıdent Qasym-Jomart Kemeluly Toqaevtyń bastamasymen Abaı murasyn nasıhattaý memlekettik deńgeıge kóterildi. Bul – tek aqynǵa ǵana emes, búkil halqymyzǵa kórsetilgen qurmet. Jyl boıy oblysta kóptegen is-sharalar, ǵylymı konferensııalar, ádebı baıqaýlar men kórmeler uıymdastyryldy. Bul – jas urpaqty rýhanı baılyqqa jeteleıtin izgi qadamdar, – dedi Aqmola oblysy ákiminiń orynbasary Dosulan Aıtbaev.
Poezııalyq «О́leń sózdiń patshasy» baıqaýynda respýblıkalyq jarystardyń jeńimpazdary Abaı fılosofııasy men shyǵarmashylyǵyna arnalǵan avtorlyq týyndylaryn oqydy. Jyrlar birde tereń tebirenispen, birde ádebı básekeniń qyzýymen oryndalyp, kórermenderdi baýrady.
Jas sýretshilerdiń «Jyl mezgilderi» baıqaýy aıasyndaǵy kórmede Kókshetaý, Qosshy, Stepnogorsk jáne oblys aýdandaryndaǵy art-stýdııalardyń jumystary usynyldy. Týyndylarda uly aqyn oılarynan shabyt alǵan beıneler men metaforalar arqyly jyl mezgilderi kórinis tapqan.
«Abaı álemi» kitap jármeńkesinde sırek basylymdar, shyǵarmalardyń túrli tilderdegi aýdarmalary jáne muraǵattyq materıaldar qoıyldy. Sondaı-aq «Sheberler shahary» qoldanbaly óner alańynda kıiz, bylǵary, tas jáne metaldan jasalǵan qazaqy dástúrli buıymdar daıyndaldy.
Folklorlyq ansamblder festıvalinde «Abaı dana, Abaı dara» taqyrybynda Atbasar, Ereımentaý, Qorǵaljyn, Jarqaıyń jáne ózge de aýdandardyń ujymdary dombyramen halyq ánderin oryndady.
Oblystyq ámbebap ǵylymı kitaphanada «Ándi súıseń, menshe súı» vokaldyq baıqaýy ótse, oblystyq halyq shyǵarmashylyǵy ortalyǵynda «Danalyq bastaýy – Abaı» teatr festıvali aıasynda aqyn men Birjan saldyń kezdesýin beıneleıtin qoıylymdar sahnalandy.
Kúnniń ekinshi jartysynda ótken «Abaı álemi» konsertine Qazaqstannyń eńbek sińirgen mádenıet qaıratkerleri qatysty. Mýzyka, poezııa, beıneleý óneri men teatr toǵysqan bul merekede Abaıdyń rýhy búgingi kúnmen úndesip, adamdardy máńgilik qundylyqtar tóńireginde biriktirdi.
Keshkisin ádebı-mýzykalyq mereke teatrlandyrylǵan baǵdarlama, mýzykalyq nómirler men shyǵarmashylyq qoıylymdarmen jalǵasady.
