Mańǵystaý oblysy ákimi baspasóz qyzmetiniń habarlaýynsha, jańa nysan 75 myń turǵynǵa arnalǵan «Semey Smart City» shaǵyn aýdanynda boı kóteredi. Etnomádenı birlestikter men qoǵamdyq uıymdardyń basyn qosatyn 3 qabatty kópfýnksıonaldy mádenı keshen birneshe bloktan turady. Kitaphana, qoldanbaly óner murajaıy, fotozerthana, kórkemóner jáne qalpyna keltirý sheberhanalary, kınozal, konferensııa zaldary qarastyrylady.
Abaı oblysynyń ákimi Berik Ýálı ǵımarattyń irgetasyn qalaý rásiminde Memleket basshysy Qasym-Jomart Toqaevtyń bastamasyn alǵash bolyp qoldaǵan Mańǵystaý oblysynyń halqyna alǵysyn jetkizdi.
– «Abaıǵa qurmet» aksııasy aıasynda mańǵystaýlyqtardyń óńirimizge syılyǵy retinde Dostyq úıiniń irgetasy qalandy. Dostyq úıi rámizdik máni óte zor, eki óńirdiń jalpyulttyq tutastyǵyn bildirmekshi. Búgingi is-shara elimizdiń qos qıyrynyń birligi men ulttyq biregeıliginiń jarqyn kórinisi dep bilemin. Mańǵystaý men Abaı oblysy batys pen shyǵys shekarada jatqan shalǵaı aımaq bolsa da, nıeti ortaq, tileýi bir ekenin búkil Alash jurtyna kórsetti. Mańǵystaý oblysy azamattarynyń eldiń sálemin alyp, Abaı toıynyń ústinde qurylysty bastaýy úlken qurmetke laıyq, – dedi Berik Ýálı.
Mańǵystaý oblysy delegasııasynyń atynan memlekettik qyzmet salasynyń ardageri, Mańǵystaý oblysynyń qurmetti azamaty D.Seıbaǵytov, Qoǵamdyq kelisim ortalyǵy-oblystyq úıiniń dırektory N.Sharova men Abaı oblysy Qazaqstan halqy Assambleıasy ǵylymı saraptamalyq tobynyń tóraǵasy A.Bazenov Mańǵystaý jurtshylyǵyna óńir turǵyndary atynan alǵys aıtty.
Osy sátte Aqtaý qalasynda Abaı Qunanbaıulynyń eskertkishine gúl shoqtaryn qoıý rásimi ótti.
Qatysýshylar aqyn shyǵarmashylyǵynan óleńder oqyp, uly oıshyldyń qazaq ádebıeti men rýhanııatyna qosqan aıryqsha úlesin eske alyp, aqyn shyǵarmalarynyń qundylyǵyn atap ótti.
Mańǵystaý oblysy
