«Keleshek mektepteri» – bul tek jańa ǵımarat salý emes. Bul – balanyń jan-jaqty damýyna qolaıly, qaýipsiz jáne ınklıýzıvti bilim berý ortasyn qalyptastyrýǵa baǵyttalǵan ulttyq deńgeıdegi strategııalyq joba.
Memleket basshysy bul jobany eldegi orta bilim sapasyn arttyrý, aýyl men qala arasyndaǵy bilim alshaqtyǵyn joıý úshin usyndy. Eń bastysy, bul joba barlyq balaǵa teń múmkindik berýdi kózdeıdi.
2023 jyldan bastap jobany kezeń-kezeńimen júzege asyrý bastaldy. Qazirdiń ózinde birqatar óńirde jańa formattaǵy mektepter ashyldy. Bıylǵy jyldyń sońyna deıin mundaı formattaǵy 217 mektepti qoldanysqa berý josparlanyp otyr. Bul – 460 myńnan astam oqýshy orny. Sonyń ishinde 40 paıyzdan astamy aýyldyq eldi mekenderge tıesili. Bul – aýyl balasy da qaladaǵylarmen birdeı jaǵdaıda bilim alýyn qamtamasyz etedi degen sóz.
Birinshiden, jańa formattaǵy mektepter keń ári ergonomıkalyq turǵyda tıimdi etip jobalanǵan. Tıptik mektepterge qaraǵanda 15-20%-ǵa úlken. Ár oqýshyǵa jeke shkaf, transformer-parta, tynyǵý aımaǵy qarastyrylǵan.
Ekinshiden, Ulttyq joba aıasynda salynǵan mektepterde qaýipsizdik júıeleri kúsheıtilgen. Mektepter zamanaýı beınebaqylaý jáne ǵımaratqa kirip-shyqqandardy qadaǵalaý júıelerimen qamtamasyz etilgen. Bastaýysh jáne joǵary synyptar bólek-bólek bloktarda oqıdy. Munyń barlyǵy balanyń qaýipsiz ári jaıly ortada bilim alýyna baǵyttalǵan.
Úshinshiden, bul mektepterde STEM-zerthanalar, IT kabınetter, aspazdyq jáne tigin sheberhanalary, 2-4 sport zaldary, robottehnıka kabınetteri jumys isteıdi. Bul – oqýshylarǵa tek teorııa emes, praktıka arqyly úırenýge múmkindik beredi. Barlyq mektep zamanaýı jıhazdarmen, oqý qural-jabdyqtarymen jabdyqtalyp, árbir oqý kabıneti úshin qajetti tehnıkalyq quraldar jıyntyǵy qamtamasyz etilgen. Munyń barlyǵy ustazdardyń jumysyn jeńildetip, oqýshylardyń bilim sapasyn kóterýge múmkindik beredi.
Ár mektepte erekshe bilimdi qajet etetin balalar úshin tolyq jaǵdaı jasalǵan. Lıft, pandýs, arnaıy dárethanalar, ınklıýzıvti kabınetter, logoped, psıholog qyzmeti – barlyǵy qoljetimdi. Bilim barlyq balaǵa birdeı bolýy kerek. Bul – jobanyń negizgi ustanymdarynyń biri.
Muǵalimder ınteraktıvti tehnologııalar men pándik zerthanalardy qoldana otyryp, ár oqýshynyń qyzyǵýshylyǵy men qabiletine qaraı tulǵalyq damýyna jol ashady. Bilim berý úderisinde Prezıdent belgilegen «Adal azamat» tujyrymdamasynyń negizinde oqýshylardy ádildikke, eńbekqorlyqqa jáne adamgershilikke baýlıtyn qundylyqtar júıesi qalyptasqan. Mekteptegi bilim berý úderisi tek oqytý emes, ómirge beıimdeý, jaýapkershilik sezimin oıatý jáne qoǵamdyq sanany damytýǵa baǵyttalǵan.
Bul mektepterde balalardyń boıynda ekologııalyq mádenıetti qalyptastyrý, qorshaǵan ortany qorǵaý, resýrstardy únemdi paıdalaný sııaqty jaýapkershilikti seziný daǵdylaryn damytýǵa erekshe mán berilip otyr. Osy qaǵıdalar Memleket basshysynyń «Taza Qazaqstan» ıdeıasyn balalarǵa mektepten bastap sińirýdi kózdeıdi.
Biz tek ǵımarat salyp qoımaımyz, sol mektepterge arnaıy daıarlyqtan ótken muǵalimderdi jiberýdi kózdep otyrmyz. Qazirdiń ózinde 3 myńnan astam pedagog arnaıy kýrstardan ótti. Olardyń bári sıfrlyq quraldar, jańa ádistemelermen jumys isteýge mashyqtanyp jatyr.
Sonymen qatar jetekshi pedagogıkalyq joǵary oqý oryndarymen birlesip, arnaıy kadr daıarlaý júıesi jolǵa qoıyldy. Al mektep dırektorlary «Bilim berý salasyndaǵy 1000 kóshbasshy» jobasynyń qatysýshylary arasynan tańdalady.
Joba sheńberinde bastaýysh synyptan bastap kásiptik baǵdar berý júıesi engiziledi. 7-synyptan bastap beıindi pánder, jeke oqý baǵyttary, mentorlyq júıe jolǵa qoıylady. Qazir «Mansap kompasy» atty sıfrlyq platforma ázirlenip jatyr. Bul oqýshyǵa óziniń qyzyǵýshylyǵy men qabiletine qaraı bolashaq mamandyǵyn tańdaýǵa baǵyt beredi.
Bilim sapasyn, ınfraqurylymyn damytý – adam kapıtalyna salynǵan ınvestısııa. Biz bilimdi, bastamashyl, jaýapkershiligi joǵary urpaq tárbıeleý arqyly memlekettiń bolashaǵyn qalyptastyryp jatyrmyz. «Keleshek mektepteri» – tek bilim oshaǵy emes, ol zamanaýı oılaıtyn, ulttyq qundylyqty qadirleıtin, tehnologııalyq saýatty tulǵanyń qalyptasý ortasy.
Maıra MELDEBEKOVA,
Oqý-aǵartý birinshi vıse-mınıstri
