Sýret: ernur.kz
«EXPO National Day Hall» (EXPO Ulttyq kúni zaly) alańynda mınıstr A.Shaqqalıev pen Osaka EXPO-2025 qaýymdastyǵy ókilderiniń qatysýymen Qazaqstan Respýblıkasynyń týyn kóterý rásimi ótkizildi.
«Búgingi is-shara qazaqtyń uly oıshyly Abaı Qunanbaıulynyń 180 jyldyǵyna oraılastyrylǵan. Bul óńirlerdiń geografııalyq qashyqtyǵyna qaramastan, rýhymyzdyń jaqyn ekenin bildiredi, sebebi bizdi dástúrler men aǵa býynǵa degen qurmet, bilim men eńbekke degen joǵary mán biriktiredi», dedi A.Shaqqalıev is-sharanyń resmı ashylý saltanatynda.
О́z kezeginde Japonııanyń ekonomıka, saýda jáne ónerkásip vıse-mınıstri Akııosı Kato Osakadaǵy EXPO-da ótken elimizdiń Ulttyq kúnimen qazaqstandyq delegasııany quttyqtap, mádenı almasýdyń ózara túsinistikti, yntymaqtastyqty jáne eki el arasyndaǵy baılanystardy damytýdaǵy mańyzdylyǵyna toqtaldy.
Dúnıejúzilik kórme qonaqtary úshin Qazaqstannyń Ulttyq kúnin merekeleý sheńberinde EXPO aýmaǵynda balýanymyz tórt dúrkin álem rekordshysy Sergeı Syrýlnıkovtiń, ulttyq kıimdegi ártister men batyrlardyń qatysýymen aýqymdy sherý uıymdastyryldy. «Expo Hall Shining Hat» sahnasynda qazaq ónerpazdarynyń qatysýymen konsert qoıyldy. Aýqymdy merekelik baǵdarlamaǵa shamamen 3 myń kórermen jınady. El mádenıetiniń baılyǵyn pash etken Dına Nurpeıisova atyndaǵy akademııalyq halyq aspaptary orkestriniń áýenderimen, Sarmad jáne Art Dombyra ansamblderiniń etno jáne folklorlyq yrǵaqtarymen, opera solısteri Zarına Altynbaeva men Altynbek Ábildanyń keremet daýysy, sondaı-aq «Birlik» ansambliniń jigerli bı qoıylymdary jáne Qazaqstannyń kóptegen basqa da talantty ártisteriniń ónerimen este qaldy. Keshte Qurmanǵazynyń, N.Tilendıevtiń, Q.Ahmedııarovtyń, L.Hamıdıdiń, E.Brýsılovskııdiń jáne halyq súıispenshiligine bólengen ózge de kompozıtorlardyń týyndylary kórermenniń ystyq yqylasyna bólendi.
Qazaqstan pavılony kelýshiler arasynda óte tanymal ekenin aıta ketken jón. Oǵan kelgen qonaqtar sany 900 myńǵa jetti.
Qaperleı ketsek, bıyl Japonııanyń Osaka qalasynda EXPO-2025 dúnıejúzilik kórmesi bastaldy. Uıymdastyrýshylardyń deregi boıynsha aýqymdy is-sharaǵa 160 el men 9 halyqaralyq uıym, 28 mln-nan asa adam qatysady degen boljam bar.
