– Aqnazar, aldymen ózińdi orasan táýekelge bel býyp, jankeshtilikpen jetken tabysyńmen quttyqtaımyn. Balqashty júzip ótý ıdeıasy qalaı týdy? Buryn-sońdy mundaı qashyqtyqqa júzip kórdiń be?
– Quttyqtaýyńyzǵa rahmet, birneshe kúnnen beri qoldaýshylarym, janashyr jaqyndarym jyly sózin arnap, yqylasyn bildirip jatyr. Kóńiliń ósip, kádimgideı marqaıyp qalady ekensiń.
Endi ıdeıa qaıdan týdy degenge kelsek. О́zim kópten beri oılap júr edim. Odan buryn álemdegi parajúzgishterdiń shalqar teńiz, aıdyn kóldiń betinde júzgen nátıjelerin saraladym. Biraq birde-bir parajúzgish mundaı qashyqtyqqa táýekel etpepti. Byltyr Býrabaı kólinde 2,5 shaqyrymǵa júzip ashyq sýda ózimniń áleýetimdi synap kórdim. Bir jyl daıyndyq júrgizip, Balqashty júzip ótýge bel býdym.
– 20 shaqyrymdy júzip ótý jeńil tımeıtini anyq, júreksindiń be?
– Meni alańdatqan júzip ótý emes, osy aýqymdy sharany uıymdastyrý isi boldy. Eń aldymen, júzip ótetin baǵytty mejelep, shaqyrymyn ólshep aldyq. Odan keıin neshe saǵatta júzip ótetinimdi baǵamdadym. Soǵan qaraı beınejazbaǵa taspalaıtyn operatordy tabý qıynǵa soqty. Habarlandyrý arqyly qońyraý shalyp birneshe mamanmen tildestim. Kópshiligi buryn-sońdy mundaı táýekelshil adamdy taspalap kórmegendikten tańdanyp jatty. Keıbiri aqyl-esi kem adamǵa balady. Aqyry Almatydan jaqyn tanysymyz arqyly taspalaýshy jigitter taptym. Aıtpaqshy, bulardan buryn taǵy bir toppen keliskenbiz. Mejeli kúnge bir kún qalǵanda sózden taıqyp, aınyp ketti. Sodan keıin osy jigittermen kelisim jasastyq. Men kóldi qalaı júzip ótemin dep ýaıymdamadym, uıymdastyrý isi uıqymdy qashyrdy. Túsirýshi topty alyp júretin katerdi jalǵa alýdyń mashaqaty ońaı bolmady. Osyndaı irili-usaqty sharýalar tıtyqtatyp jiberdi de, jattyǵýǵa basa kóńil bóle almadym. Biraq táýekelmen bastaǵan isti aqyryna jetkizý úshin barymdy
saldym.
– 13 saǵat sýdan shyqpaı júzdiń. Tolqyn kedergi keltirmedi me?
– Biz sóreden tań alageýimde attandyq. Túske deıin kóldiń beti tynyq boldy da, asa qıyndyq týdyrmady. Tek sáskege taman jel turyp, tolqyn qaqpaqyldap baǵytymnan buryp jiberip otyrdy. Dúrkin-dúrkin qıys ketip, qaıta baǵytyma burylamyn dep ábden silelep qaldym. Besin aýa jel basylyp, tolqyn sabasyna túsip, kóńilim ornyqty. Osylaısha, ózimiz aldyn ala boljaǵan merzimde Balqash kólin júzip óttim.
– Nartáýekelge bel býǵanyńdy ata-anań birden qoldaı ketpegen bolar?
– Árıne, anam meniń kóldi júzip ótsem degen maqsatymdy bilgende qarsy boldy. Ana úshin biz árdaıym balamyz ǵoı. Amandyǵymdy oılasa kerek. Biraq bala kúnimnen maqsatyma jetpeı tynbaıtyn qaısarlyǵymdy biletindikten aqyry qoldady.
– 2018 jylǵa deıin temirjol salasynda eńbek ettiń. Árıne, eske túsirý jeńil tımesi anyq. Dese de taǵdyryńnyń parasportpen qabysýyn baıandap ótseń.
– Iá, synaqqa túsken, qıyn shaqtar ótti ǵoı... Sol jyly Jambyl oblysynyń aýmaǵyndaǵy «Aspara – Tátti» shoıyn jol bóligine jóndeý júrgizip jatqanda úsheýmizdi poıyz qaǵyp ketti. Dastan degen dosym kóz aldymda jantásilim etti. Meniń bir qolym men bir aıaǵymdy julyp áketti. Úshinshi kisi de qolynan jaraqat aldy. Tún aýǵan tusta qansyrap jatqanymdy bilem, esimdi jısam aýrýhana tósegine tańyp tastapty. Kóp uzamaı oń qolym men oń aıaǵymdy kesti. Jaryq dúnıe esigin ekinshi ret ashqandaı kúı keshtim. Qıyndyq, kedergi aýyr soqqanymen barlyǵyn eńserdik. Bes ret pyshaqqa túsip operasııa jasady. Keıin kesilgen qol men aıaqtyń jarasy jazylyp, protezge úırengenshe de kóp ýaqyt ótti. Ońqaı bolǵandyqtan sol qolmen jazýǵa, tamaq ishýge, basqa da jumysty isteýge úırenisý de aýyr soqty.
Osylaısha, uzaqmerzimdik emdelýden keıin sportpen shuǵyldanýǵa bel býdym. Qaraǵandydan Astanaǵa kóship kelgen soń, otyryp oınaıtyn paravoleıbol úıirmesine jazyldym. Biraq jalqy qolmen uzaqqa bara almaıdy ekensiń. Aqyrynda bala kúnnen úırengen júzýdi damytsam dep sheshtim. Qysqa merzimde sporttyq normatıvti oryndap, el ishindegi mártebeli saıystarǵa qatysýǵa múmkindik aldym. Kóp ótpeı parajúzýshiler arasynda el birinshiligine qatysyp, chempıon atandym.
– Endigi maqsat qandaı?
– Ázirge osy jetistigimdi Gınnestiń rekordtar kitabyna endirýdiń áýresimen júrmin. Parajúzgishter arasynda meniń kesilgen qolym men aıaǵymnyń kemdigi M6 sanatyna jatady. Osy sanattaǵy parajúzgishterdiń eshbiri ashyq sýda bir qol, bir aıaqpen 20 shaqyrym júzip ótpepti. Mundaı jankeshtilikpen eńsergen eńbegim eleýsiz qalmasa deımin. Keleshekte Paralımpıada, álem chempıonaty syndy bási joǵary saıystarǵa qatysyp, parajúzýden elimniń mártebesin asqaqtatsam deımin.
Áńgimelesken –
Qýanysh NURDANBEKULY,
«Egemen Qazaqstan»
