Biz – álemdik naryqtyń bir bólshegimiz, sondyqtan JI salasynda bolyp jatqan kez kelgen iri jańalyq elimizdiń ekonomıkasy men qoǵamyna tikeleı yqpal etedi. Álemdegi tehnologııalyq kúshter qazirden bastap JI-di medısınadan bastap ónerge deıin, óndiristen bastap memlekettik basqarýǵa deıingi barlyq baǵytta qoldanýǵa kiristi. Bul – elimiz úshin de ekonomıkalyq ósimniń, eksportty ulǵaıtýdyń jáne jańa mamandyqtar qalyptastyrýdyń úlken múmkindigi. «Astana Hub» ekojúıesi dál osy múmkindikti utymdy paıdalanyp, aımaqtyq tehnologııalyq hab rólin atqarýǵa qadam jasap otyr. Qazirdiń ózinde otandyq startaptar ishinde álemdik deńgeıde moıyndalǵandary bar. Mysaly, medısınadaǵy bıotehnologııany damytatyn «Arlan Biotech», kontent generasııasy boıynsha sheshimder usynatyn «Higgsfield AI» sııaqty jobalar bizdiń eldiń JI salasynda básekege qabiletti ekenin dáleldep otyr.
Memleket basshysy Qasym-Jomart Toqaev atap ótkendeı, aldaǵy on jylda elimizdiń basty mindeti – osyndaı startaptarǵa ınvestısııa tartý, tehnologııany jergilikti naryqqa beıimdeý jáne eksporttyq baǵytty kúsheıtý bolýǵa tıis. Bul – elimizge jahandyq JI naryǵynda óz ornyn ıelenýge jol ashady. Biz jasandy ıntellektiniń tutynýshysy ǵana emes, óndirýshisi, eksporttaýshysy bolýymyz kerek.
HH ǵasyrda Japonııa men Ońtústik Koreıa ınnovasııanyń altyn dáýirin der kezinde paıdalanyp, tehnologııalyq alpaýyttarǵa aınaldy. Endi dál sondaı múmkindik bizge de berilip otyr. «Múmkindik terezesi» árqashan ashyq turmaıdy. Eger qazir áreket etsek, elimiz JI naryǵynda mańyzy bar elge aınalady.
Danabek Qalıajdarov,
«Astana HUB» bas dırektorynyń keńesshisi, IT-sarapshy
