Bıyl bul ózende taǵy da lotos gúldedi. Lotos alqabynyń aýmaǵy shamamen – 8-10 gektar. Sý ústindegi sulýlyq rámizi shildeniń ortasy men tamyzdyń sońyna deıin búr jaryp turady. Bir qyzyǵy, tań atysymen qaýyzy ashylǵan sáttegi kórinistiń jóni bólek. Quddy sý ústine alqyzyl kilem tóselgendeı kórinedi. Samal jelmen terbelip turatyn lotostyń uzyndyǵy 2 metrge deıin jetedi. Al japyraǵynyń dıametri 60 santımetrge sozylady. Nege ekeni belgisiz, ińirde alqyzyl gúldiń qaýyzy qaıta jabylady.
Qıǵash ózenindegi osynaý keremetti sózben sýretteý múmkin emes, tańǵajaıypty kózben kórý kerek. Sol sebepti, Qurmanǵazy aýdanynyń ákimdigi 26 shildede sý aıdynyna jaqyn ornalasqan Teńiz aýylynda «Lotus Fest – 2025» halyqaralyq festıvalin ótkizdi. Munaıly óńirdegi otandyq týrızmdi damytýǵa arnalǵan is-sharaǵa alǵashqy kúni Batys Qazaqstan, Mańǵystaý, Aqtóbe oblystary men Reseıdiń shekaralas óńirlerinen 5 myńnan astam týrıst keldi.
О́zen jaǵalaýyndaǵy etnoaýylda 20 kıiz úı tigildi. Tamyzdyń sońyna deıin 12 kıiz úıdi aqyly qonaqúı retinde paıdalaný kózdelip otyr. Festıval aıasynda túrli is-shara ótti, halqymyzdyń ulttyq salt-dástúrine qatysty qundylyqtar nasıhattaldy. Atyraý oblysynan 35, kórshiles Reseı Federasııasynan 3 kásipker óz ónimderin usyndy. Qolóner jármeńkesinde ulttyq naqyshpen jasalǵan buıymdar men taǵamdardyń alýan túri tanystyryldy. Jasóspirimder saz balshyqtan túrli buıym jasaýdy úırendi, qylqalammen tabıǵattyń tamasha kórinisterin beıneledi. Kóbiniń tańdaǵany – sý ortasynda ósken lotostyń ásemdigi.
«Atyrau Nomads» saıahat klýby lotos alqabyndaǵy keremet kórinisti tamashalaýǵa týrısterdi 30 kólikpen alyp keldi. Saıahat klýby uıymdastyrǵan saparmen kelgen týrıster sany – 150 adam. Klýb quryltaıshysy Erlan Tórálıevtiń aıtýyna qaraǵanda, 2020 jyly lotos alqabyna tanymdyq týr ótkizilipti. Bıylǵy týrısterdiń deni lotos alqabyn buryn kórmegen eken.
«Klýbymyz belsendi saıahatshylardyń uıǵarymymen qurylǵan. Buryn da elimizdiń ózge óńirleriniń týrıstik mekenderine, atap aıtsaq, Mańǵystaý oblysyndaǵy Bozjyra jazyǵyna saıahat uıymdastyrdyq. Lotos – tabıǵattyń sırek kórinisi. Ásirese balalar úshin umytylmas kórinis. Bıylǵy saparymyzda balalarǵa elimizdiń tańǵajaıyp tabıǵatyn kórsetýdi maqsat ettik. Mundaı saparlar tabıǵatqa degen súıispenshilikti arttyrady», deıdi E.Tórálıev.
Saıahat klýbynyń sapary aldaǵy kúnderi Batys Qazaqstan oblysynyń Bókeı ordasy aýdanyndaǵy Han ordasy tarıhı-mádenı, arhıtektýralyq-etnografııalyq murajaı-qoryǵyna jalǵasady.
Ulttyq sport túrlerinen uıymdastyrylǵan saıystar kópshiliktiń delebesin qozdyrdy. Qol kúresine 24 sportshy qatysty. Eń kóp sportshy qazaq kúresinen baq synady. 80 kg salmaqta 18, odan joǵary salmaqta 10 balýan beldesti. Sadaq, asyq atý saıysyna qyzyǵýshylar qarasy da kóp boldy. Arqan tartysta 30-ǵa jýyq sportshydan quralǵan 6 komanda saıysqa tústi.
Ulttyq sporttyń básin kótergender arasynda elge tanylǵan sportshylar da bar. Sonyń biri – 43 jastaǵy balýan Bekbolat Salyqov. Buryn qazaq kúresinen respýblıkalyq saıystarda top jarǵan ardager sportshy qarsylasynyń bárin jeńip, jeńimpaz atandy. Býra san jigitter ziltemirdi tóbesinen asyra kóterip, birneshe metrge deıin júrip ótti.
Týrıster lotos alqabyna 30-dan astam qaıyqpen bardy. Ár qaıyqqa shamamen 5 adam mindi. Festıvaldyń alǵashqy kúninde 550-ge jýyq qaıyq reısi jasaldy.
Atyraý oblysy
