Sport • 15 Tamyz, 2025

Jarystar kúndeligi: Fýtbol

60 ret

kórsetildi

2 mın

oqý úshin

Almatynyń «Qaırat» fýtbol klýby ÝEFA Chempıondar lıgasy irikteýiniń pleı-off kezeńine shyqty. Irikteý satysynda Rafael Orazbahtın baptaıtyn «Qaırat» fýtbolshylary Slovakııanyń «Slovan» klýbyn penaltı serııasynda jeńdi. Alǵashqy tartys Almatynyń «Ortalyq stadıonynda» ótip, 1:0 esebimen «Qaırat» basym tússe, Bratıslavada ótken qarymta matchta dál osyndaı eseppen «Slovan» ozdy. Ekstra taımda da esep ózgergen joq. Matchtan keıingi penaltı serııasynda almatylyqtardyń mereıi ústem boldy. «Qaırat» fýtbolshylary endi 19 tamyzda Shotlandııanyń Glazgo qalasynda «Seltık» klýbyna qarsy oınaıdy. Qarymta match 26 tamyzda Almatyda ótedi.

Qýanysh NURDANBEKULY

Qyrkúıektiń 13–21 aralyǵynda Horvatııanyń Zagreb qalasynda kúres túrlerinen eresekter arasynda álem chempıonaty túńligin túredi. Madııar Quramysov baptaıtyn erkin kúres quramasy Grýzııada oqý-jattyǵý jıynyn ótkerip júr. Álem chempıonatynyń júldesi úshin erkin kúresten beldesýge túsetin balýandar naqtylandy. 57 kg salmaqta Ádilet Álmuhamedov, 61kg salmaq dárejesinde Asyljan Esengeldi kúresse, 65kg salmaqta reseılik legıoner Nachyn Kýýlar, 70 kg salmaqta byltyr álem chempıony atanǵan Nurqoja Qaıpanov, 74 kg salmaq dárejesinde Álibek Ábilqasym, 79 kg-da Bolat Saqaev, 86 kg salmaqta álem chempıonatynyń eki dúrkin qola júldegeri Azamat Dáýletbekov beldesedi. 92 kg salmaqta jastar arasynda jasyndaı jarqyldaǵan Kamıl Kýrýglıev, 97 kg-da álem chempıony Rızabek Aıtmuhan, 125 kg salmaqta Álisher Erǵalı synǵa túsedi.

16–30 tamyz kúnderi Shymkent qalasynda nysana kózdeýden jáne stend atýdan XVI Azııa chempıonaty ótedi. Qurlyq dodasyna Bahreın, Vetnam, Gonkong, Úndistan, Qatar, Qytaı, Kýveıt, Malaızııa, BAÁ, Oman, Saýd Arabııasy, Sıngapýr, Ońtústik Koreıa, Japonııa syndy 26 memleketten 800-den astam sportshy qatysady. Jasóspirimder, jastar men eresekter arasyndaǵy qurlyq chempıonatynda tapansha, vıntovka, jyljymaly nysana kózdeý, stend atýdan júldeni bóliske salady.