Memleket basshysy Úkimettiń keńeıtilgen otyrysynda «Jańa óndirister ashyp, qosylǵan quny joǵary taýarlar shyǵarý úshin aýqymdy ınvestısııa tartqan jón. Joǵary tehnologııamen sapaly qurysh quıý tásilin meńgerý kerek. Mundaı ónimder kólik jasaý ónerkásibine jáne basqa da salalarǵa qajet. Aldaǵy bes jylda kásiporyn óndiris qarqynyn barynsha arttyrý qajet», degen edi.
Elimizde kommersııalyq jáne arnaıy tehnıka óndiretin birlesken kásiporyn quryldy. Kásiporyn Qytaıdyń «Sinotruk» kompanııasynyń elimizdegi «Saran Machinery» kompanııasymen birlesýi nátıjesinde iske qosylady. Joba Úkimet jáne Qaraǵandy oblysy ákimdiginiń qoldaýymen ónerkásiptik yntymaqtastyqty damytý aıasynda júzege asyrylady. О́ndiristiń jyldyq qýaty 10 000 tehnıkany, onyń ishinde HOWO markaly júk kólikterin shyǵarýdy josparlap otyr. Osylaısha, Saran qalasynda Qaraǵandy oblysynyń ónerkásiptik áleýetin arttyratyn jańa zaýyt boı kóterip, HOWO markaly júk kóligi jáne arnaıy tehnıka qurastyrylady. Búginde jańa zaýyttyń qurylys jumystary bastalyp ketti.
Seriktestik týraly kelisimge Premer-mınıstrdiń birinshi orynbasary Roman Sklıardyń qatysýymen Astanada qol qoıylǵan bolatyn. Joba sátimen júzege assa, eldegi kommersııalyq tehnıka óndirisi jańa deńgeıge kóterilmek. О́ńir ákimi Ermaǵanbet Bólekpaev qurylys alańyna baryp, zaýyttyń quryltaıshylarymen kezdesip, qurylys jumysyn baqylap qaıtty. О́ńir basshysy bul jobanyń óńir ekonomıkasy men el ónerkásibiniń damýyna qosar úlesi zor ekenin aıtyp otyr.
– Bul – Qytaı kompanııasymen yntymaqtastyqtyń iri qadamy. HOWO markaly tehnıkaǵa degen naryqtaǵy suranys joǵary. Jergilikti atqarýshy bılik retinde bul iske tikeleı aralasyp otyrmyz. Jobanyń merziminde ári sapaly júzege asýy úshin barynsha qoldaý kórsetýge daıynbyz. Bul joba myńǵa jýyq jumys ornyn quryp, zamanaýı tehnologııalardyń engizilýine jáne óńirdiń ónerkásiptik damýyna yqpal etedi. Zaýytta jylyna 10 myńǵa deıin tehnıka shyǵarý josparlanýda. Munda shanaqty korrozııadan qorǵaıtyn jáne mashınalardyń qyzmet etý merzimin uzartatyn metaldy kataforezdik óńdeýdiń elimizdegi alǵashqy jelisi ornatylady. Jańa zaýyt Qaraǵandy oblysynyń ónerkásiptik áleýetiniń taǵy bir rámizine aınalady, – dedi Ermaǵanbet Qabdýlauly.
Mamandardyń aıtýynsha, metaldy kataforezdik óńdeý jelisi tehnologııasy kólik shanaqtaryn tozýdan senimdi qorǵap, qyzmet merzimin aıtarlyqtaı uzartady. Joba jetekshisi Stanıslav Lıdiń aıtýynsha, qurylys-montaj jumystary jyl sońynda aıaqtalýǵa tıis. Tolyq óndiristik sıklge arnalǵan jabdyqqa tapsyrys berilgen. О́ndiris jelisin iske qosý jeltoqsan aıyna josparlanypty. Kelesi jyly shamamen 2 000 tehnıka shyǵarylyp, óndiris kólemi kezeń-kezeńimen ulǵaıa bermek.
Zaýytqa qajetti jabdyqtar 2025–2026 jyldary «О́nerkásipti damytý qorynyń» qoldaýymen jetkiziledi. Alǵashqy partııa – shassı men kabına qurastyrýǵa arnalǵan jabdyqtar bıyl qazanda keledi. Keler jyldyń ekinshi toqsanynda boıaý jáne dánekerleý sehtaryna arnalǵan keshendi qondyrǵylar ornatylady.
Qaraǵandy oblysy
