Sýret: almaty.tv
Premer-mınıstr Qyrǵyz Respýblıkasymen shekarada ornalasqan «Qordaı» jáne «Qarasý» avtokólik ótkizý beketterine baryp, nysandardyń ınfraqurylymymen, bekettegi ózekti máselelermen jáne mundaǵy jumysty shıratý jónindegi josparlarmen tanysty.
EAEO elderimen shekarada 39 avtokólik ótkizý pýnkti bar. Atalǵan beketterdiń ekeýinde jóndeý jumystary mejeli merzimde tolyqqandy aıaqtalǵan. Jańǵyrtý jumystary 10 pýnktte, onyń ishinde Qazaqstan-Reseı shekarasynda bastalǵan. О́zge de ótkizý pýnktteri jańǵyrtylmaq.
«Qordaı» avtokólik ótkizý beketinde júrgizilgen jańǵyrtý jumystarynyń nátıjesinde qozǵalys jolaqtarynyń sany 4-ten 8-ge deıin artqan. Sondaı-aq tólqujattyq qadaǵalaý kabınalarynyń sany 20-dan 40-qa deıin jetkizilgen. Naqty derekke júginsek, mundaǵy ótkizý qabileti 4 esege, avtokólik boıynsha 2,7 esege ósken.
Al «Qarasý» pýnkti boıynsha jańǵyrtý jumystary bastaldy. Qolǵa alynǵan jumystyń nátıjesinde munda ótkizý qabileti táýligine 700-den 2 myńnan astam kólik quralyna deıin arttyrýǵa múmkindik týmaq. Sonymen qatar júk aǵyny men kólik qozǵalysyn jaqsartý josparlanǵan.
Úkimet basshysy shekara nysandary transshekaralyq yntymaqtastyqty damytýda mańyzdy ról atqaratynyn jáne halyqaralyq avtomobıl jáne jolaýshylar qatynasyn qamtamasyz etetinin atap ótti. Olarǵa rekonstrýksııalaý jumysyn júrgizý Memleket basshysynyń jeke baqylaýyna alynǵan.
Oljas Bektenov jóndeý jumystarynyń sapaly ári ýaqtyly oryndalýyn qamtamasyz etýdi, sondaı-aq rásimdeý jumystaryn jyldamdatý boıynsha sıfrlyq tehnologııalardy engizýdi jandandyrý kerektigin atap ótti. Sonymen qatar azamattar men syrtqy ekonomıkalyq qyzmetke qatysýshylar úshin qaýipsizdikti qamtamasyz etý jáne jaılylyqty arttyrý maqsatynda jaǵdaı jasaý úshin birqatar tapsyrma júktedi.
Sapar barysynda «Batys Eýropa – Batys Qytaı» halyqaralyq dáliziniń quramynda taýarlardy saqtaý, óńdeý, shoǵyrlandyrý jáne ótkizýdiń negizgi ortalyǵyna aınalatyn ındýstrııalyq-saýda-logıstıkalyq keshen salý jobasyn júzege asyrý týraly baıandaldy. Oljas Bektenov qurylys jumystarynyń merzimi sozylyp ketýine baılanysty syn aıtyp, qysqa merzimde tıisti sharalar qabyldaýdy jáne jumys sapasy men qarqynyn qadaǵalaýdy kúsheıtýdi tapsyrdy.
Jambyl oblysy
