Memleket basshysy bilim sapasy tárbıemen tyǵyz baılanysty ekenin aıtyp, bul eki uǵymdy bir-birinen bólýge bolmaıtynyn erekshe atap ótti.
«Bilim tárbıemen ushtasqanda ǵana berekeli, sapaly bolady. Bilim men tárbıe – kez kelgen qoǵamnyń qos tuǵyry. Bul ekeýin bir-birinen bólip qaraýǵa bolmaıdy. Mektep – bilim men tálim-tárbıeniń kıeli ordasy. Uly Abaı «Adam balasy adam balasynan aqyl, ǵylym, ar, minez degen nárselermen ozbaq» degen. О́skeleń urpaqty bilimpazdyqqa baýlý qanshalyqty mańyzdy bolsa, olarǵa durys jol kórsetý, baǵdar berý de sonshalyqty mańyzdy. Biz jastardyń adal ári eńbekqor bolyp ósýine erekshe mán berýimiz qajet. Ul-qyzdarymyz jaqsy men jamannyń, aq pen qaranyń arasyn ajyrata bilýi kerek», dedi Qasym-Jomart Toqaev
Bıyldan bastap elimizdiń barlyq mektepterinde, sonyń ishinde jekemenshik bilim berý uıymdarynda «Adal azamat» birtutas tárbıe baǵdarlamasy iske asyrylady. Prezıdent bul bastamany pedagog mamandardy daıarlaıtyn joǵary oqý oryndaryna da engizýdi usyndy.
«Ulttyq bilim salasyndaǵy tárbıe jumysynda birtutas júıe bolýy kerek. Jas urpaqtyń boıyna jalpyulttyq qundylyqtardy sińirý qajet. Árbir jas otanshyl, jasampaz, jańashyl, bilimpaz, eńbekqor, uqypty, únemshil bolyp ósýi kerek. Sondaı azamattar ǵana mádenıetti, qaýipsiz ári «Zań men tártip» ústemdik quratyn qoǵamnyń irgesin qalamaq», deıdi Prezıdent.
Qasym-Jomart Toqaev urpaq tárbıesinde ata-ana, muǵalim jáne memlekettik organdardyń birlese jumys isteýi qajet ekenin atap ótti. Onyń aıtýynsha, bul – ortaq jaýapkershilik.
«Halqymyz «Tárbıe tal besikten bastalady» dep beker aıtpaǵan. Urpaq tárbıesinde ata-ana, muǵalim jáne memlekettik organdar birge jumys isteýge tıis. Sebebi, jaýapkershilik bárine – ortaq. Hakim Abaı da «Adamnyń adamshylyǵy aqyl, ǵylym, jaqsy ata, jaqsy ana, jaqsy qurby, jaqsy ustazdan bolady» dep aıtqan.
«Otbasy – mektep – memleket» úshtigi úılesimdi bolsa, jaqsy nátıjege jetýge bolady. Al bul úshtiktiń ózeginde – eńbekqorlyq ıdeıasy bolýǵa tıis. Jas urpaqqa eńbeksiz eshqandaı ıgilik bolmaıtynyn únemi túsindirip aıtý kerek. Qoǵamda masyldyqqa jol bermeý qajet. Sebebi, bul jol tek tyǵyryqqa tireıdi», dep atap ótti el Prezıdenti.
Qasym-Jomart Toqaev «Taza Qazaqstan» jalpyulttyq aksııasyn tek qorshaǵan ortany qorǵaý sharasy ǵana emes, sonymen qatar sana tazalyǵyn qalyptastyrýdyń mańyzdy qadamy retinde baǵalady.
«Taza Qazaqstan» jalpyulttyq aksııasy – osy baǵyttaǵy naqty sharanyń biri. Men buǵan deıin de aıttym. Taza Qazaqstan degenimiz – qorshaǵan ortany taza ustaý ǵana emes. Árıne, ol da mańyzdy. Sonymen birge, bul – oı-sana tazalyǵy degen sóz. Jan-dúnıesi taza adam qaıyrymdy, meıirimdi bolady. Qoly taza adam jemqorlyqqa barmaıdy, adal bolady. Asyl qasıetterdi boıyna sińirgen naǵyz adal azamattar Ádiletti Qazaqstannyń tiregi bolatyny sózsiz», dedi Memleket basshysy.
