- Álemdik dodalarda sańlaqtarymyz mereıimizdi asyryp, kók týymyzdy jelbiretti. Atap aıtqanda, short-trekshi Denıs Nıkısha naýryz aıynda Beıjińde (Qytaı) ótken álem chempıonatynda mansabyndaǵy ekinshi kúmis medalin jeńip aldy. Mánerlep syrǵanaýdan Bostonda (AQSh) uıymdastyrylǵan jahandyq dodada Mıhaıl Shaıdorov araǵa 6 jyl salyp, el qorjynyna kúmis júlde syılady. Frıstaıl-mogýldan Anastasııa Gorodko Sent-Morıs qalasynda (Shveısarııa) ótken frıstaıldan álem chempıonatynda úzdik úshtikti túıindedi.
- Qysqy sport túrlerinen «Azıada-2025» dodasynan otandastarymyz 4 altyn, 9 kúmis, 7 qola medal aldy. Short-trekten Olımpıada baǵdarlamasyna kiretin 5 000 metr qashyqtyqta erler quramasy tarıhı altyn medaldy jeńip aldy. Frıstaıl-akrobatıkadan sınhrondy sekirý básekesinen Roman Ivanov pen Sherzod Hashırbaev dál osy saıystan alǵash ret altyn júlde aldy. Frıstaıl-akrobatıkadan aralas komandalyq saıysta 15 jastaǵy Asylhan Asan, Sherzod Hashırbaev, Aıana Joldas kúmis medaldy enshiledi. Frıstaıl-akrobatıkadan sınhrondy sekirý básekesinen Ardana Mahanova men Aıana Joldas qola júldeger atandy. Short-trekten 2 000 metr qashyqtyqtaǵy aralas komandalyq saıysta Ádil Ǵalıahmetov, Denıs Nıkısha, Abzal Ájiǵalıev, Mersaıd Jaqsybaev, Iаna Han, Malıka Ermek, Alına Ajǵalıeva, Olga Tıhonova alǵash ret júldeger atandy. Konkımen júgirýden 100 metr qashyqtyqta Evgenıı Koshkın kúmis aldy. Konkımen júgirýden komandalyq sprınt básekesinde Nadejda Morozova, Krıstına Sılaeva, Darıa Vajenına úzdik úshtikke endi.
- Naýryz aıynda Serbııanyń Nısh qalasynda ótken bokstan áıelder arasyndaǵy álem chempıonatynda orasan olja buıyrdy. Birneshe jyldyq úzilisten keıin ulttyq qurama joǵary nátıjege qol jetkizip, el qorjynyna 3 altyn, 2 kúmis jáne 1 qola medal saldy. Nazym Qyzaıbaı boksshylardyń arasynda úsh dúrkin álem chempıony ataǵyn alǵan alǵashqy boksshy atandy. Sondaı-aq Alýa Balqybekova men Aıda Ábikeeva da top jardy. Vıktorııa Grafeeva men Eldana Tálipova kúmis medal ıelense, Natalıa Bogdanova qola júldemen qaıtty.
- Dzıýdodan maýsym aıynda Býdapeshtte (Majarstan) ótken álem chempıonatynda Ábıba Ábýjaqynova qazaq sportynyń tarıhynda qyzdar arasynan alǵash bolyp fınalda beldesip, kúmispen kúpteldi.
- 10–24 mamyr aralyǵynda Shrı-Lanka astanasy Kolomboda ótken bokstan U22 Azııa chempıonatynda Baqyt Sársekbaevtyń tizgindeýimen erler quramasy top jardy. 13 salmaqtyń 12-sinde fınalǵa shyqqan jigitterimiz 10 altyn, 2 kúmis medal jeńip aldy.
- Fýtzaldan UEFA Chempıondar lıgasynyń fınalynda Almatynyń «Qaırat» klýby Ispanııanyń «Palma» komandasynan 4:9 esebimen jeńilip, kúmis júldeni qanaǵat tutty. Buǵan deıin almatylyq ujym Chempıondar lıgasynyń fınalyna 2019 jyly ǵana shyqqan edi.
- Maýsym aıynda Ońtústik Koreıanyń Kýmı qalasynda ótken jeńil atletıkadan Azııa chempıonatynda sańlaqtar 3 altyn, 2 kúmis, 1 medal jeńip aldy. Alǵash ret 3 000 metrge kedergimen júgirý, 5 000 jáne 10 000 metrge júgirýde Nora Djerýto men Deızı Djepkemeı osy qashyqtyqtarda el tarıhyndaǵy alǵashqy júldelerdi oljalady.
- Semserlesýden Balıde (Indonezııa) ótken Azııa chempıonatynda sapy jattyǵýynda synǵa túsken otandastarymyzdyń arasynan Vadım Sharlaımov alǵash ret qola júldeger atandy. Ol jarys jolynda qurlyq dodasynyń basty favorıti, Parıj Olımpıadasynyń chempıony Kokı Kanony 1/4 fınalda (Japonııa) 15:14 esebimen jeńdi.
- Kórkem gımnastıkadan Sofııada (Bolgarııa) ótken jasóspirimder arasyndaǵy álem chempıonatynda Aqmaral Erekesheva ánurandy shyrqatty. Ol dop jáne taspa jattyǵýynda top jaryp, al shyǵyrshyq saıysynda kúmis júldege ıe boldy.
- Alty aıda elimizde ótken jahandyq saıystardyń da bási joǵary. Mamyrda Astanada dzıýdodan ótken «Qazaqstan Barysy Grand Slam 2025» halyqaralyq týrnırinde Qazaqstan quramasy rekordtyq nátıjemen 9 medal enshiledi.
- Bokstan 30 maýsym – 6 shilde aralyǵynda elordadaǵy Jaqsylyq Úshkempirov atyndaǵy Jekpe-jek saraıynda alǵash ret álem kýboginiń úshinshi kezeńi ótti. 30 elden 300-ge jýyq boksshy synǵa túsken básekede elimiz quramasy 16 salmaqta júlde tuǵyrynan kórinip, 8 altyn, 4 kúmis, 4 qola medal oljalady.
- Elimiz uzaq jyldardan keıin aýyr atletıkadan jastar men jasóspirimderdiń Azııa chempıonatyn ótkizýge múmkindik aldy. Tolaǵaılar 7 altyn, tórt ret kúmis, alty qola medalǵa qol jetkizdi. Azııa chempıonatynda Ksenııa Prozorova (58 kg), Álıhan Áskerbaı (71 kg), Nurjan Jumabaı (79 kg), Edige Emberdi (79 kg), Kıra Danılova (69 kg), Erasyl Sáýlebekov (88 kg), Denıs Polýboıarınov (94 kg) top jardy.
