Fınaldyq tartysta 55 kg salmaq dárejesinde synǵa túsken eki dúrkin álem chempıony Bekjan Tólepov ırandyq qarsylasy Rııahı Abýlfazlmen beldesti. Tartysty kúrestiń nátıjesinde otandasymyz bir jartylaı jeńis jáne eki jambas upaıymen aıqyn basymdyqqa ıe boldy. Halyqaralyq dárejedegi sport sheberi Saǵyndyq Áshim (66 kg) ózbekstandyq balýan, kýrashtan álem chempıony Artıom Shtýrbabınmen kúresken. Negizgi ýaqyt teń aıaqtalyp, qos balýan qosymsha bir mınýttyq beldesýge shyqty. Munda salmaq ólsheýde qarsylasynan birshama jeńil bolǵan Saǵyndyq Áshim qazaq kúresiniń erejege sáıkes jeńis toıyn toılady.
Budan keıin 82 kg salmaqta el namysyn qorǵaǵan «Dala qyrandary – 2025» tıtýlynyń ıegeri Nurdáýlet Baqytbaıuly reseılik sambo sheberi, álem chempıonatynyń júldegeri Gleb Golovpen aıqasty. Bes mınýtqa sozylǵan bul kúres barysynda qos balýannyń upaılary teń tústi. Qosymsha bir mınýttyq beldesýde otandasymyz ádis jasaýǵa umtylyp, qarsylasynyń sheńgeline túsip qaldy. 100 kıloda sambodan álem chempıonatynyń júldegeri reseılik Vladımır Dosııak kýrashtan Azııa oıyndarynyń chempıony ózbek balýany Jahongır Mamatrahımovty bir jambas ádisimen utty.
Áıelder arasyndaǵy beldesýler asa tartysty ótti. 48 kg salmaqta synǵa túsken V Dúnıejúzilik kóshpeliler oıyndarynyń jeńimpazy Aıjan Jylqybaeva qyrǵyzstandyq qarsylasy Alıman Abdrashıtovany aıqyn jeńip, qarsylasyna esh múmkindik bermedi. 56 kıloda synǵa túsken eki dúrkin álem chempıony Raýza Nurmuhametova da jankúıerlerin qýantty. Ol kýrashtan Qyrǵyzstan chempıony Sabına Jaanbekovany eki mınýttyń ishinde taza jeńispen utyp, bul ataqqa úshinshi márte ıe boldy.
О́kinishke qaraı, Zarına Sarıpova (65 kg) men Zámzágúl Faızollanova (77 kg) altynǵa bir qadam jetpeı súrindi. Zarına Reseıden kelgen Darııa Kýzmıchevadan aılasyn asyra almasa, Zámzágúl Faızollanova ózbekstandyq balýan Shahzoda Bozorovaǵa ese jiberdi.
Elorda tórindegi áskerı qyzmetshiler arasyndaǵy álem chempıonatyn Týrızm jáne sport mınıstrligi, Qorǵanys mınıstrliginiń Sport komıteti men Qazaq kuresi assosıasııasy birlesip uıymdastyrdy.
