M.Áshimbaev T.Narbaevaǵa iltıpat bildirip, delegasııa múshelerin О́zbekstannyń kele jatqan Táýelsizdik kúnimen quttyqtady. Sondaı-aq ol eki eldi tereńnen tamyr tartatyn baýyrlastyq, dostyq, tatý kórshilik dástúr baılanystyratynyn atap ótti. Palata spıkeri Memleket basshylary aıqyndap bergen ózara is-qımyldyń joǵary qarqynyn ári qaraı jalǵastyrý, sonymen qatar ornyqty bolashaqqa qol jetkizý jáne Ortalyq Azııanyń ortaq mindetterin iske asyrý jolynda birlesken is-qımyldyń mańyzdy ekenine nazar aýdardy.
«Bizdiń elderimiz arasynda barlyq deńgeıde tyǵyz saıası qarym-qatynas jolǵa qoıylǵan. Ekonomıkalyq ózara is-qımyl belsendi damyp, mádenı-gýmanıtarlyq baılanystar da nyǵaıyp keledi. Bul – eń aldymen, memleketterimizdiń basshylary Qasym-Jomart Toqaev pen Shavkat Mırzııoevtiń berik dostyǵynyń, qurmet pen senimge negizdelgen qarym-qatynasynyń jáne olardyń erik-jigeri men birlesken jumysynyń nátıjesi. Joǵary deńgeıdegi turaqty kezdesýler men Memleket basshylarynyń ózara saparlary barysynda mańyzdy kelisimderge qol jetkizildi. Osy rette О́zbekstan Prezıdenti byltyr tamyz aıynda elimizge jasaǵan memlekettik saparyn erekshe atap ótken jón. Sonyń aıasynda aldaǵy 10 jylǵa arnalǵan strategııalyq seriktestik pen yntymaqtastyq baǵdarlamasy qabyldandy. Memleket basshylary deńgeıinde qol jetkizilgen barlyq kelisimdi tıimdi iske asyrýǵa óz úlesimizdi qosý – bizdiń basty mindetimiz», dep, Senat tóraǵasy kelesi jyly Almatyda ótetin О́ńirlik klımattyq sammıttiń negizgi taqyryptaryna toqtaldy.
Sonymen qatar kezdesýde Qazaqstan men О́zbekstan Parlamenti Palatalary arasyndaǵy Yntymaqtastyq jónindegi komıssııa jumysynyń nátıjeleri talqylandy. Oǵan qosa, Ortalyq Azııa memleketteriniń Parlamentaralyq forýmy aıasynda Ortalyq Azııanyń saıası, ekonomıkalyq jáne mádenı áleýetin iske asyrý jónindegi mindetter belgilendi.
«Elderimiz arasynda parlamentaralyq yntymaqtastyqty damytýdyń mańyzy zor. Búgin osy baǵyttaǵy aldaǵy mindetterdi aıqyndaıtyn Palatalar arasyndaǵy ózara is-qımyldardyń Jol kartasyna qol qoıamyz. Bul qujatty qabyldaý zań shyǵarý qyzmetinde tájirıbe almasýdy jandandyrýǵa, birlesken is-sharalar men konsýltasııalar ótkizýge, sondaı-aq, tıisti komıtetter men Palatalar Apparattary arasyndaǵy ózara is-qımyldy damytýǵa múmkindik beredi», dedi M.Áshimbaev.
Suhbat kezinde taraptar sý-energetıka, kólik-logıstıka jáne ekologııa salasyndaǵy jobalardy, sondaı-aq aýyl sharýashylyǵy, mashına jasaý, bilim, kommýnıkasııa men sıfrlandyrý baǵyttaryn damytýǵa, azyq-túlik qaýipsizdigin jáne basqa da mańyzdy sektorlardy qamtamasyz etýge arnalǵan bastamalardy da Parlamentter arqyly qoldaýǵa erekshe nazar aýdardy.
Kezdesýde parlamentaralyq baılanysty odan ári nyǵaıtýmen qatar Álemdik jáne dástúrli dinder kóshbasshylarynyń aldaǵy sezi sheńberinde rýhanı dıplomatııany damytý máselesi de sóz boldy. M.Áshimbaev atalǵan Forýmdy О́zbekstan tarapy jan-jaqty qoldap, О́zbekstan musylmandary basqarmasy sezge belsendi qatysyp kele jatqanyn aıtty jáne baýyrlas eldiń ókilderi dinaralyq dıalogti ilgeriletýge, álemdi alańdatyp otyrǵan búgingi ózekti máselelerdi sheshý jolynda rýhanı lıderlerdi jumyldyrýǵa atsalysqany úshin alǵys bildirdi.
О́z kezeginde T.Narbaeva elimizdiń Ortalyq Azııa óńirin damytýǵa qosqan úlesi, sondaı-aq kóptegen syn-qaterdi eńserý jáne negizgi baǵyttar boıynsha qazaq-ózbek baılanystaryn nyǵaıtý jolyndaǵy erik-jigeri úshin rızashylyǵyn jetkizdi. Sonymen qatar Olıı Májilis Senatynyń tóraǵasy qazirgi tańda dinder men mádenıetter arasyndaǵy beıbitshilik, kelisim jáne toleranttylyq ıdeıalaryn ilgeriletýdiń mańyzdy ekenin aıtyp, yntymaqtastyqtyń aıasyn odan ári keńeıtýge múddeli ekenin bildirdi.
