Foto: White House / X
Aldymen Zelenskıı men Tramp jeke sóılesip, keıin kelissózderge Eýrokomıssııa tóraǵasy Ýrsýla fon der Lıaıen, Germanııa kansleri Frıdrıh Mers, Fransııa prezıdenti Emmanıýel Makron, Fınlıandııa prezıdenti Aleksandr Stýbb, Ulybrıtanııa premer-mınıstri Kır Starmer, Italııa premer-mınıstri Djordja Melonı jáne NATO bas hatshysy Mark Rıýtte qosyldy.
Kezdesý barysynda basty másele Reseımen dıalogty bastaýǵa arnaldy. Donald Tramp Vladımır Pýtınmen sóıleskenin jáne onyń Zelenskıımen kezdesýge daıyn ekenin málimdedi. Germanııa kansleri Merstiń aıtýynsha, ekijaqty kezdesý aldaǵy eki aptada ótýi múmkin, keıin úshjaqty formatta kelissóz jalǵasady.
Ýkraına qaýipsizdigi jóninde naqty kelisimder de jasaldy: Kıev AQSh-tan 90 mıllıard dollar kóleminde qarý-jaraq satyp alady, onyń tólemin Eýropa elderi kóteredi. Sonymen birge Ýkraına áskerı drondar óndirisin jolǵa qoıady. Al shekara jáne jer máselesi bul joly qaralmady, ol Reseıdiń qatysýymen ótetin úshjaqty kezdesýde talqylanbaq.
Aq úıde Zelenskıı men Tramp urys alańynyń kartasyn birge zerdelegeni belgili boldy. Kelissózdiń qorytyndysynda Tramp «Reseı men Ýkraına arasynda beıbitshilik ornatý múmkindigi artty» dese, Zelenskıı «Soǵysty toqtatýdyń joldaryn izdeýge daıynmyn» dep málimdedi.
Fransııa prezıdenti Emmanıýel Makron «Qurama Shtattarmen qaýipsizdikke kepil bolý jáne áriptestik ornatý jóninde kelistik» dese, Ulybrıtanııa premeri Kır Starmer «Kezdesý óte jemisti ótti, taraptar arasynda túsinistik bar» dep baǵalady.
Aıta keteıik, buǵan deıin Tramp pen Pýtın Alıaskada júzdesip, Ýkraına máselesin jeke talqylaǵan bolatyn.
