Almaty-Qonaev tas jolynyń qashyqtyǵy – 42 shaqyrym, oblystyń týrıstik nysandaryn qoljetimdi etetin mańyzdy kólik toraby. Osy baǵyt arqyly Qapshaǵaıǵa, odan ári Alakól demalys ornyna baratyn týrıster sany jyl saıyn artyp keledi. Bıyl Qapshaǵaı sýqoımasyna demalys maýsymynyń basynan beri 860 myń týrıst demalýǵa barsa, al maýsym sońynda 1,6 mln adamǵa jetedi degen boljam bar.
Respýblıkalyq mańyzy bar joldardyń sapasy artqan saıyn jolaýshylar aǵyny da eselene túsken. Almaty-Qonaev tas jolynda táýligine 30 myńǵa jýyq, al demalys kúnderi 50 myńnan asa kólik júredi. Bul – Almaty oblysyndaǵy eń qarqyndy, qozǵalys jyl boıy toqtamaıtyn belsendi baǵyttyń biri.
«Almaty-Qonaev» aqyly tas joly eki baǵytty, úsh jolaqty. Onda kólik ıeleri jolaqysyn tóleýge arnalǵan 12 termınal iske qosylǵan. Árbir termınalda otyrǵan operatorlar jolaýshylarǵa tólem jasaý, jol baǵytyna qatysty keńes beredi. Mundaǵy mamandar jolaqysyn der kezinde tólemese, keptelis týyndaıtynyn aıtady.
«Kólik tizgindegen árbir júrgizýshi jolǵa shyǵar aldynda jolaqysyn tóleý qajettigin umytpaǵan abzal. Jolaqysyn tólemegen jolaýshylar termınalǵa kelgende tólem jasap, ýaqyt alady. Sonyń kesirinen keptelis bolady», deıdi «KAJservıs» JShS ınjener-arhıtektory Dáýren Zakırov.
Almaty-Qonaev tas jolynda jolaýshylar úshin jol boıyna ulttyq standartqa saı janarmaı beketteri ashylǵan. Týrıst aǵyny ósken saıyn ondaı keshenderge degen suranys artyp keledi. Mamandar mundaı keshenderdiń standartqa saı árbir 25 shaqyrym saıyn ornalasý qajettigin atap aıtty.
Jergilikti bılik ókilderiniń aıtýynsha, Qapshaǵaıǵa demalýshylardyń artýyna tegis joldar oń yqpal etip jatyr.
«Demalys maýsymy aıaqtalǵanǵa deıingi esep boıynsha Qapshaǵaıǵa shamamen 1 mln 600 myń adam kelýge tıis. Onyń ishinde sheteldik jáne ishki týrıster de bar. Almaty aglomerasııasy mańaıyndaǵy turǵyndar da osy jerde demalady. Jol sapasy osy týrıstik aǵynnyń artýyna tikeleı baılanysty», deıdi Almaty oblysy Týrızm basqarmasy bóliminiń basshysy Sherhan Esentemirov.
Almaty oblysy
