Is-shara barysynda Jumysshy mamandyqtary jylyna jáne «Adal azamat» baǵdarlamasynyń iske asyrylýyna oraı úlken kórme ashyldy.
Jıynda Qostanaı oblysynyń ákimi Qumar Aqsaqalov bilim men tehnologııa tez ózgerip jatqan ýaqytta eldiń bolashaǵy oqý sapasyna tikeleı baılanysty ekenin atap ótti.
Keńeske arnaıy kelip qatysqan Oqý-aǵartý mınıstrligi apparatynyń basshysy Tımýr Ábilmájinov muǵalimderge jańa oqý jylyndaǵy basty baǵyttardy, strategııalyq maqsattar men mindetter jóninde baıandady.
Sondaı-aq, «KIA Qazaqstan» zaýytynyń bas dırektory Kım De Kı óńirde mashına jasaý ónerkásibine kadrlar qajet ekenin tilge tıek ete kelip, búgingi tańda kásiporyn Qostanaı avtokólik kolledjimen birlese otyryp, suranysqa ıe mamandardy daıarlaý máselesine basa kóńil qoıyp otyrǵanyn aıtty.
Keńes sońynda ozyq muǵalimder marapattaldy. Máselen, ardager ustaz, Qostanaı qalasynyń qurmetti azamaty Begen Kópeshke «Qazaqstannyń eńbek sińirgen ustazy» qurmetti ataǵy tabys etildi. Tórt muǵalim «Bilim berý isiniń qurmetti qyzmetkeri» tósbelgisimen marapattaldy. Sondaı-aq, 25 muǵalim oblys ákiminiń gramotasyn aldy.
Beıimbet Maılın aýdanynyń Sapar Erǵalıev atyndaǵy jalpy bilim beretin mektebi «Orta bilim beretin úzdik mekeme» atansa, Qostanaı joǵary polıtehnıkalyq kolledji «Tehnıkalyq jáne kásibı bilim beretin úzdik mekeme» baıqaýynyń jeńimpazy atandy. Eki bilim ordasyna da 68 mıllıon teńgeniń sertıfıkaty tabystaldy.
Qostanaı oblysy
