Birlikke qyzmet etkender marapattaldy

QHA sessııasynyń jumysyn oblys ákimi Ǵaýez Nurmuhambetov ashyp, júrgizip otyrdy. Ol Qazaqstan halqy Assambleıasynyń tarıhy elimizdiń egemendik jylnamasymen tyǵyz astasyp jatqanyn, osy ýaqyt ishinde Assambleıa elimizdegi birlik pen teńdiktiń, turaqtylyq pen tynyshtyqtyń rámizine aınalǵanyn tilge tıek etti. Odan ári ákim QHA Soltústik Qazaqstan obly­syn­da­ǵy fılıa­lynyń birshama jumys­taryna toq­tal­dy.

«Oblystyq assambleıa memlekettik tildi nasıhattaýǵa belsendi qatysady. Osy rette «Orys, slavıan jáne kazak uıymdarynyń qaýymdastyǵy» janynda qazaq tilin aýyzeki tilde sóıleý klýby qurylǵan. Onyń ashylýyna Iýlııa Rodıonova óz úlesin qosty. Al «Barbang» kúrdter qaýymdastyǵynyń» oblystyq fılıaly Hýdaıbergen Afandıevtiń jetekshiligimen óz kásipornynda qyzmetkerler arasynda qazaq tilin úırený tájirıbesin tabysty júrgizip otyr», dedi Ǵ.Nurmuhambetov.

Qazaqstan halqy Assambleıasy Hatshyly­ǵy­nyń meńgerýshisi Marat Ázilhanov Memleket basshysynyń QHA-nyń XXXIV sessııasynda júktegen tapsyrmalaryn iske asyrý, etnosaralyq birlikti nyǵaıtý, aqparattyq-túsindirý jumysynyń tıim­di­li­gin arttyrý, azamattyq qoǵam ınstıtýttaryn QHA jobalaryn júzege asyrýǵa tartý, sondaı-aq etnomedıasııa ınstıtýtyn damytý máseleleri boıynsha óz oıyn ortaǵa saldy.

Sessııa barysynda oblystyq assambleıa tóraǵasynyń qoǵamdyq negizdegi orynbasary qyzmetine evreı etno-mádenı birlestiginiń tóraǵasy Rashbıl Evdaev taǵaıyn­dalatyny jarııalandy.

Sessııa sońynda assambleıa jumysyna belsendi qatysqan azamattarǵa M.Ázilhanov «Alǵys» tósbelgisin tapsyrdy. Atap aıtqanda, «Tájik etno-mádenı ortalyǵy» fılıa­lynyń tóraǵasy Ý.Radjabov, «Ko­pernık» polıak mádenı ortalyǵynyń tóraǵasy V.Korneva, «Qoǵamdyq kelisim» KMM basshysynyń orynbasary B.Bazarbaev osy qurmetke laıyn dep tanyldy. Al izgiliktiń, rýhanı kelisimniń, dostyq pen etnosaralyq birlikti nyǵaıtýdyń gýmanıstik murattaryna joǵary qyzmet etkeni úshin Qazaqstan halqy Assambleıasynyń Alǵyshatymen «Barbang» kúrd qaýym­dastyǵy birlestiginiń múshesi K.Badyrov, tatar-bashqurt qo­ǵamdyq birlestiginiń belsendisi R.Ramazanova marapattaldy. Et­nosaralyq kelisim men jalpy­ulttyq birlikti nyǵaıtýǵa qosqan úlesi úshin Soltústik Qazaqstan oblysy ákiminiń Alǵyshattary I.Sorokınge, V.Bedeshovke, A.Djanýnske, M.Harsıevke, t.b. berildi.

Osy kúni M.Qozybaev atyn­da­ǵy Soltústik Qazaqstan ýnıver­sıtetiniń bazasynda JOO-nyń Stýdenttik assambleıasy ashyldy.

PETROPAVL