Qyzyqty oıyn túrinde ótken tárbıe sabaǵy barysynda Jergilikti polısııa qyzmeti basqarmasynyń aǵa ınspektory Olesıa Babıch kishkentaı bóbekterge jol belgileriniń maǵynasyn, joldy qalaı durys kesip ótý keregin, jol ortasyndaǵy ala syzyq ne úshin qajet ekenin túsindirdi.
Patrýldik polısııa ınspektory búldirshinderge jol tártibin retteýshiniń ıshara qımylyn kórsetip, ár qımyldyń neni meńzeıtinin aıtyp berdi. Artynsha tártip saqshysynyń qımylyn balalar da qaıtalap, onyń ne maǵyna beretinin bir-birinen surap, jaýap alyp jatty.
Qostanaı oblysy PD Jergilikti polısııa qyzmeti basqarmasynyń aǵa ınspektory Olesıa Babıchtiń aıtýynsha, balalardy qaýipsizdik erejelerine úıretý – polısııa jumysynyń asa mańyzdy bir salasy.
«Balanyń minez-qulqy mektepke deıingi jasta qalyptasady. Sondyqtan bala jolda ózin qalaı ustaý keregin jastaıynan bilýi kerek. Biz joldy qalaı kesip ótý keregin ǵana úıretpeımiz, sonymen qatar balalardy kóshede muqııat bolýǵa, óziniń de, ózgeniń de qaýipsizdigin oılaýǵa jáne jol erejelerin saqtaýǵa úıretemiz», deıdi Olesıa Babıch.
№16 balabaqshanyń dırektory Galına Travkına da mektepke deıingi tárbıe mekemesinde jol qaýipsizdigi erejelerin úıretý, balanyń júris-turys daǵdysyn qalyptastyrýǵa kúndelikti kóńil bólinip otyratynyn atap ótti.
«Bizde jol erejelerine arnalǵan arnaıy ınteraktıvti buryshtar bar. Ár topta ózderiniń stendteri, jol belgileriniń maketteri, jaıaý júrginshi ótkelderi men oıynshyq kólikter qoıylǵan. Munyń bári balalarǵa oıyn arqyly jolda ózin qalaı ustaýdy úıretedi. Al polıseılermen ótken búgingi kezdesý oqý-tárbıe úderisin odan da qyzyqty ete túsedi», deıdi balabaqsha basshysy.
Qostanaı oblysy
