Aldaǵy jyldary qala boıynsha jalpy aýdany 161 myń sharshy metrdi quraıtyn 72 turǵyn úı salý kózdelgen. Qurylystyń qarqyndy júrgizilýiniń nátıjesinde páter kezegi jyldam qozǵalyp, turǵyndar baspanaly bolmaq. Qonaev qalasy – oblys ortalyǵy bolǵaly beri 193 otbasy qonystoıyn toılaǵan. Bıyldyń ózinde 108 páter kilti saltanatty túrde tabystalǵanyn atap ótken qala ákimi, jyl sońyna deıin júzege asatyn sharalardy da tilge tıek etti.
«Búgingi kúni «Qarlyǵash» shaǵynaýdanynda 18 jer úı kópbalaly otbasylar, jetim, áleýmettik osal toptaǵy azamattarǵa berilip otyr. Budan bólek, 24 páter kilti tabystalýda. Jalpy sany 42 otbasy baspanaly boldy. Jyl sońyna qaraı úıli bolatyn otbasylardyń sany 200-den asady dep kútilýde. Konstıtýsııa kúnimen qatar kelgen qýanyshtaryńyz qutty bolsyn!», – dedi shahar basshysy.
Bul kúni shańyraqtary shattyqqa tolǵan turǵyndardyń biri – Dınara Táýirbaeva boldy. Múgedektigi bar eki balany tárbıelep otyrǵan ol, kezekte turǵanyna birneshe jyldyń júzi bolǵanyn alǵa tartty.
«Qýanyshym qoınyma syımaı tur. Ár otbasyǵa osyndaı jaqsylyq buıyrsyn. El irgesi myǵym bolsyn. Ata Zańymyzdyń 30 jyldyǵy qarsańynda qýanyshqa keneltken el azamattaryna alǵysymyz sheksiz», – dedi ol.
Aıta keteıik, berilgen jer úıler men páterler satyp alý quqyǵymen jalǵa berildi. Alǵashqy jarnasyn tóleý arqyly úılerdi jekeshelendirip alýǵa bolady. Jalpy Qonaev qalasynda 3800-den astam turǵyn úı kezeginde tur. Páter alýǵa kezekke turý úshin «Otbasy banktiń» qosynyna habarlasý qajettigin eske salady.
Almaty oblysy.
