Shilde aıynyń sońynda Mańǵystaý oblysynyń ákimi Nurdáýlet Qılybaı Qytaı Halyq Respýblıkasyna jumys saparymen baryp, óńirge ınvestısııa tartý jáne iri jobalardy ilgeriletý maqsatynda Qytaıdyń jetekshi kompanııalary men memlekettik qurylymdarynyń basshylarymen birqatar resmı kezdesý ótkizdi. Osy saparda qol jetkizilgen yntymaqtastyqty arttyryp, kelisimderdi bekitý úshin «Aqtaý teńiz porty» arnaıy ekonomıkalyq aımaǵynyń delegasııasy Szının qalasynda ótken «Shekaraaralyq saýdany damytýǵa arnalǵan jahandyq sheshimder» konferensııasynda Mańǵystaý oblysynyń ınvestısııalyq múmkindikterin tanystyryp, «Aqtaý teńiz porty» AEA-nyń artyqshylyqtary men keleshegine toqtaldy.
«Mundaı kásiporyndar Mańǵystaýda ashylsa, elimizdegi munaı kompanııalary ónimdi shetelden emes, ózimizden alar edi», deıdi AEA basqarma tóraǵasynyń orynbasary Asylbek Dosanov.
2024–2025 jyldary Mańǵystaý óńiriniń týrıstik, kólik-logıstıkalyq áleýeti men óńdeý ónerkásibin damytý maqsatynda 1730 gektar Aqtaý halyqaralyq áýejaıynyń aýmaǵy, 178 gektar Aqtaý qalasynyń jaǵalaý aımaǵy, 280,2 gektar Jańaózen qalasynyń ónerkásiptik aımaǵy jáne 284,6 gektar Sarja teńiz termınaly «Aqtaý teńiz porty» AEA aýmaǵyna qosyldy.
Tikeleı ınvestısııa tartý maqsatynda «Aqtaý teńiz porty» AEA quramyna 3 jańa sýbaımaqty qosý jumysy júrgizilip jatyr.
«Osy sýbaımaqtardyń ishinde Munaıly aýdany sýbaımaǵy boıynsha aýdan ákimdigi jer ýchaskelerin memleket menshigine alý jumysyn júrgizip jatyr. Bul aımaqta ósip kele jatqan naryqtyń qajettiligin qamtamasyz etý jáne taýar aınalymynyń tıimdiligin arttyrý maqsatynda qoıma jáne logıstıkalyq ınfraqurylymdy damytý josparlanǵan, deıdi «Aqtaý teńiz porty» AEA» AQ basqarma tóraǵasy Múbárak Tólegenov.
Aıtýynsha, josparlanǵan is-sharalar júzege asqan jaǵdaıda «Aqtaý teńiz porty» AEA aýmaǵy 4 407,5 gektardan 26 885,4 gektarǵa deıin ulǵaıady.
Mańǵystaý oblysy
