Osy oraıda bıyl Túrkistan oblysyndaǵy eldi mekenderdi tabıǵı gazben qamtamasyz etý úshin 80 jobany iske asyrýǵa qajetti qarjy qarastyrylǵan. Onyń ishinde bıyl 37 eldi mekendegi 46 jobanyń qurylysy aıaqtalsa, qalǵan 34 joba keler jyly júzege asady. Eldi mekenderdi gazdandyrý baǵytynda atqarylyp jatqan jumystar talqylanǵan jıynda oblys ákimi Nuralhan Kósherov jaýapty tulǵalarǵa jumysty sapaly ári merziminde oryndaý týraly tapsyrma júktedi.
«Aýdan, qala ákimdikteri tarapynan gaz qubyry júrgizilgen eldi mekenderde abonentterdi tolyq tabıǵı gazǵa qosý jumystaryn kúzgi-qysqy jylytý maýsymyna deıin tolyq aıaqtańyzdar. Gaz nysandarynyń qurylysyn merziminde aıaqtap, anyqtalǵan kemshilikterdi shuǵyl túrde qalpyna keltirýdi tapsyramyn», dedi oblys ákimi.
Jýyrda, ıaǵnı Konstıtýsııanyń 30 jyldyq mereıtoıy qarsańynda Maqtaaral aýdanynda 3 eldi mekenge tabıǵı gaz berildi. Jańajol aýyldyq okrýgine qarasty Jeńis aýyly, J.Nurlybaev aýyldyq okrýgine qarasty Myrzatóbe aýyly jáne Dostyq aýyldyq okrýgine qarasty Gúlistan aýyldarynda gaz jaǵý rásiminde aýdan ákimi Baqyt Nasyrhanuly turǵyndardy kópten kútken qýanyshtarymen quttyqtady.
«Eldi mekenderdi tabıǵı gazben qamtamasyz etý – Memleket basshysynyń júktegen negizgi mindetteriniń biri. Bul – tek turmystyq jaǵdaıdy jaqsartý emes, sonymen qatar ekologııany saqtaý, ómir sapasyn arttyrý baǵytyndaǵy mańyzdy qadam. Búgin, mine, taǵy úsh aýylymyzǵa gaz berilip otyr», dedi aýdan ákimi.
Gaz mamandary qaýipsizdikti saqtaý boıynsha turǵyndarǵa túsindirý jumystaryn júrgizip, únparaqshalar taratty. Turǵyndar jyly lebizderin bildirip, ásirese kómir tasymaldaý, kúl shyǵarý, ot jaǵý sekildi qıyndyqtar artta qalǵanyn, ómir súrý sapasy edáýir jeńildeıtinin aıtty. Búgingi tańda aýdandaǵy eldi mekenderdiń 75%-y tabıǵı gazǵa qosylǵan. Keler jyldyń sońyna deıin Maqtaaral aýdanyn 100% gazben qamtamasyz etý josparlanyp otyr.
Al Kentaý qalasyndaǵy 18 063 abonenttiń 15 750-i, ıaǵnı 87,2 paıyzy tabıǵı gaz júıesine qosylǵan. Sonymen qatar qalaǵa qarasty aýyldardy gazdandyrý jumystary qarqyndy júrip jatyr. Kentaý qalasy tabıǵı gazben №14 «Qyzylásker» avtomatty gaz taratý stansasy arqyly qamtamasyz etiledi. «Beıneý–Shymkent» magıstraldy gaz qubyrynyń 1 230 shaqyrymynda ornalasqan. Bul nysan 2021 jyly iske qosylǵan. Quny 4,05 mlrd teńge bolatyn AGTS-tiń jalpy qýattylyǵy saǵatyna 170 200 tekshe metr bolsa, búginde qalanyń ortasha tutyný mólsheri – 5 000 tekshe metr. Degenmen aldaǵy ýaqytta tutyný mólsheri ulǵaıatyn bolady. Sebebi qala aýmaǵyn joǵary qysymmen qamtamasyz etý, shahardy gazdandyrýdyń 3 kezeńi, jańadan salynǵan 10 kópqabatty turǵyn úıler men Shoqtas eldi mekenin «kógildir otynmen» qamtý jumystary iske asyp jatyr. Sondaı-aq Qarnaq aýylyna da gaz qubyryn tartý jumystary bastalǵan. Jalpy uzyndyǵy 139 shaqyrymdy quraıtyn gaz qubyrynyń 108 shaqyrymy jerastymen, qalǵan 31 shaqyrymy jerústimen júrgiziledi. Búginde gaz jelisiniń 24,2 shaqyrymy tartylǵan. Al Ashysaı aýylynda ortalyqtandyrylǵan gaz júıesine qosylatyn 336 turǵyn úı bar. Sondyqtan joǵary qysymdy gazǵa qosylý nysany sanalatyn Oıyq eldi mekeninen bastap uzyndyǵy 19 shaqyrym bolatyn gaz qubyry tartylmaq. Arys qalasy Jıdeli eldi mekeni de tabıǵı gaz júıesine qosyldy. Osylaısha, aýyldaǵy 2 myńnan astam turǵyn ot jaǵyp, kúl shyǵarýdan qutyldy. Buǵan deıin Baıyrqum men Kókjıde eldi mekenderi de tabıǵı gazǵa qosylǵan bolatyn. Endi Aqqala aýylyna gaz kelýge tıis.
Oblystyq energetıka jáne turǵyn úı kommýnaldyq-sharýashylyq basqarmasynyń málimetinshe, eldi mekenderdi tabıǵı gazben qamtamasyz etý jumystary josparǵa sáıkes júrgizilip jatyr. Bıyl aıaqtalýǵa tıis 46 nysannyń 27-i paıdalanýǵa berilgen. Al 19 nysannyń qurylys jumystary qarqyndy júrgizilip, turaqty baqylaýǵa alynǵan. Jyl qorytyndysymen 37 eldi meken nemese 73 myń halyq tabıǵı gazben qamtylady. Nátıjesinde, 1,9 mln turǵyny bar 600 eldi meken «kógildir otynǵa» qosylmaq. Odan bólek, 45 jobaǵa saraptamanyń oń qorytyndysy alynyp, qarjylandyrý úshin memlekettik ınvestısııalyq jobalar portfeline engizilgen. Sondaı-aq oblysta 50 myńǵa jýyq turǵyny bar 39 eldi mekendi gazben qamtý boıynsha 46 joba ázirlenip jatyr.
Jalpy, oblystaǵy eldi mekenderdi 2027 jylǵa deıin gazdandyrýdyń is-shara jospary bekitilgen. Josparǵa sáıkes, 2027 jyly gazben qamtylǵan eldi mekender sanyn 765-ke jetkizý kózdelip otyr.
Túrkistan oblysy
