Oblystyq bilim basqarmasynyń basshysy Nurbek Orshybekovtiń aıtýynsha, jańa oqý jylynda óńirdegi 523 orta bilim berýi uıymynda 247 myńnan astam bilim alýshy mektepke keledi. Olardyń 20 myńǵa jýyǵy 1 synypqa barady.
Qazirgi tańda óńirdegi 1 291 bilim mekemesinde 338 myńnan astam bala mektepke deıingi, orta, tehnıkalyq jáne kásiptik bilimmen qamtylyp, 40 myńǵa jýyq pedagog qyzmet atqarýda. Bıyl bilim berý salasyn damytýǵa 344,3 mlrd teńge bólingen.
Oblystaǵy 621 balabaqshada 63 myńnan asa bala tárbıelenýde. 2-6 jas aralyǵyndaǵy balalardyń qamtylýy – 96,1 paıyz, al 3-6 jas aralyǵynda – 100 paıyz. Qamtý úlesin arttyrý úshin bıyl 1 628 oryndyq 18 jekemenshik balabaqsha iske qosylady.
Osy jyly óńirde 26 bilim nysanynyń qurylysy júrgizilýde. Jyl sońyna deıin 10 jańa mektep pen 5 qosalqy ǵımarat paıdalanýǵa beriledi. «Keleshek mektepteri» ulttyq jobasy aıasynda Qordaı aýdanynyń Qarakemer jáne Qarasý aýyldarynda 300 oryndyq, al Taraz qalasynda 600 oryndyq mektep ashylady.Sonymen qatar 1 qyrkúıekte 4 tozyǵy jetken mekteptiń ornyna jańa ǵımarat paıdalanýǵa berilmek.
Jalpy 16 nysan kúrdeli, 41 nysan ortasha jóndeýden ótýde. Memleket basshysynyń tapsyrmasyna sáıkes úsh jyl ishinde oblystaǵy 66 mektep jańartylady. Bıyldyń ózinde 10 bilim oshaǵy qaıta jańǵyrady.
Jambyl oblysy
