Is-sharany «Memlekettik til – etnosaralyq qatynas tili» jáne «Qazaqsha án salamyz» jobalary aıasynda, óńirlik Qazaqstan halqy Assambleıasy men «Qoǵamdyq kelisim» mekemesi birlesip uıymdastyrǵanyn aıtyp ótý kerek. Keshte ataqty kompozıtordyń «Baqyt qushaǵynda», «Shynarym», «Baqyttymyn, qurbylar», «Aq bantık», «Ana týraly jyr», «Bárinen de sen sulý», «Syǵan serenadasy», «Arys jaǵasynda», «Qarakóz» sııaqty kópshilikke jaqsy tanys týyndylary oryndaldy. Konsertke jınalǵan qaýym el arasynda keńinen taralǵan ánderdi qosyla shyrqap, ystyq yqylaspen qoshemet kórsetti. Al bı ansambli halyq kompozıtorynyń ánderin bımen súıemeldedi.
Keshti Ertis-Baıan óńirinde turatyn etnos ókilderi ana tilderinde oryndaǵan popýrrımen qorytyndylady. Bul erekshe dýman Shámshi shyǵarmashylyǵy eldiń ortaq murasy ekenin dáleldeýmen qatar, etnosaralyq tatýlyq pen birlikti de baıqatty.
«Shámshi Qaldaıaqovtyń ánderi – bizdiń tarıhymyz ben mádenıetimizdiń bir bóligi. Konstıtýsııa kúni qarsańynda uıymdastyrylǵan jáne Qazaqstan halqy Assambleıasynyń 30 jyldyǵyna oraılastyrylǵan búgingi is-shara kompozıtordyń patrıotızmge, Otanǵa jáne adamdarǵa degen shynaıy súıispenshilikke toly shyǵarmalary urpaqtardy biriktiretinin taǵy bir márte rastady. Búgingi konsertke etnomádenı birlestikterdiń shyǵarmashylyq ujymdarynyń basshylary men «Assambleıa jastary» RQB ókilderi de qatysty. Bul, árıne, qoǵamdyq kelisim men ózara túsinistikti nyǵaıtý úshin mańyzdy, dep atap ótti «Qoǵamdyq kelisim» KMM basshysy Núrııa Kóbenova.
Pavlodar oblysy
