«Bul – aýyl ǵana emes, aýdanymyz úshin úlken qýanysh. Oryn sany 4,5 myńǵa kóbeıip, úshaýysymdy mektep sany 9-dan 3-ke kemidi. Bıyldyń ózinde «Keleshek mektepteri» baǵdarlamasy aıasynda 3 mektep iske qosylyp otyr. Bul – óskeleń urpaqqa jasalǵan qamqorlyq, el erteńine salynǵan ınvestısııa», dep atap ótti aýdan ákimi Nurlan Ertas.
Jańa mektepke 430 oqýshy qabyldansa, olardyń ishinde 26 baldyrǵan mektep tabaldyryǵyn alǵash attap otyr. Bilim oshaǵy zamanaýı talaptarǵa saı jabdyqtalǵan. Keń de jaryq synyp kabınetteri men sport jáne eńbekke, ónerge baýlıtyn arnaıy zaldar qajetti quraldarmen jabdyqtalyp, oqýshylardyń jan-jaqty damýyna qolaıly jaǵdaı jasalǵan.
Sondaı-aq Ile aýdanyna qarasty Muhamedjan Túımebaev aýylynda 900 oryndyq jańa mektep paıdalanýǵa berildi. Bul nysan «Amanat» partııasynyń saılaýaldy baǵdarlamasy aıasynda boı kóterip, partııanyń tikeleı baqylaýynda bolǵan.
«Partııa apatty jáne úshaýysymdy mektepterdi joıýdy mindet etip qoıdy. Eki jyl buryn oblysta mundaı 52 mektep bolǵan. Búgingi mekteptiń ashylýy – sol ýádeniń oryndalǵanynyń dáleli. Ol – Jol kartasynda belgilengen 63 nysannyń biri. Munda «STEM» zerthanasy, robottehnıka kabıneti, sport jáne shyǵarmashylyq synyptar jabdyqtalǵan», dep atap ótti oblystyq fılıaldyń atqarýshy hatshysynyń orynbasary Aslan Kóbentaev.
Jańa oqý jylynda Eńbekshiqazaq aýdanyna qarasty Tóle bı aýylynda da 450 oryndyq jańa mektep ashyldy. Onyń qurylysy qarjylandyrý tapshylyǵyna baılanysty tórt jylǵa jýyq ýaqytqa sozylyp ketken edi. Osy ýaqyt aralyǵynda 600-den astam oqýshy tar ári jarty ǵasyr buryn salynǵan eski ǵımaratta bilim alýǵa májbúr boldy.
Jobanyń aıaqtalýyna «Amanat» partııasy tikeleı aralasty. Partııa bastamasymen oblystyq bıýdjetten qosymsha qarajat bólinip, fraksııa depýtattary qurylys barysyn turaqty baqylaýda ustady. Sonyń nátıjesinde aýyl turǵyndarynyń kópten kútken armany oryndalyp, jańa mektep óz esigin aıqara ashty.
Aıta keteıik, bilim ınfraqurylymyn damytý – «Amanat» partııasynyń basty basymdyqtarynyń biri. Jańa mektepterdiń ashylýy úshaýysymdy oqytýdy azaıtyp qana qoımaı, muǵalimder úshin turaqty jumys oryndaryn kóbeıtýge, sondaı-aq myńdaǵan oqýshyǵa zamanaýı ári qaýipsiz jaǵdaıda bilim alýǵa múmkindik beredi.
«Búgin oblysymyzdaǵy 491 mektep esigin aıqara ashyp, 362 myńnan asa oqýshy oqý jylyn bastady. Osy oqý jylynda 1-synyptyń ózine ǵana 35 500 bala qabyldanyp otyr. Bul barlyq bala sanynyń 10 paıyzyn quraıdy jáne óńirde bala sanynyń qarqyndy ósip otyrǵanyn kórsetedi», deıdi oblystyq bilim basqarmasynyń basshysy Araılym Aqsýbaıqyzy.
Almaty oblysy
