Bul ıgi bastama – erekshe qajettilikteri bar balalardyń erkin oınap, qoǵamǵa beıimdelip, shyǵarmashylyq áleýetin damytýyna baǵyttalǵan.
«Jabyq arqan alańy» – zamanaýı talaptarǵa saı jasalǵan, erekshe balalardyń qozǵalys pen oıyn arqyly erkindigin sezinip, senimin nyǵaıtýǵa arnalǵan biregeı keńistik. Munda balalar tegin bilim alyp, olar qoǵammen aralasýdy úırenip, jańa múmkindikterin ashady. Al «Inklıýzıvti shyǵarmashylyq ortalyǵynda» balalar vokal, bı, sýret, qolóner úıirmelerine jáne ár jastaǵy stýdııalarǵa qatysyp, óz darynyn shyńdaıdy. Sondaı-aq erekshe bilim berý qajettilikteri bar balalar kásibı pedagogterden dáris alady.
Aıta keteıik, «Balalar ınklıýzıvti akademııasy» keıingi úsh jyl boıy Almatyda tegin ınklıýzıvti bilim berý keńistigin damytyp keledi. Búginde onyń el kóleminde 15 fılıaly jumys isteıdi. Olardyń beseýi resmı mektep retinde lısenzııa alýǵa qujatyn tapsyrǵan.
Uıymnyń negizin qalaýshy – «Balalar ınklıýzıvti akademııasy» qoǵamdyq birlestigi ortalyǵynyń basshysy, úzdik pedagog Nurym Nurǵalıev. Onyń bastamasymen mektepterde arnaıy kabınetter ashylyp, erekshe balalarǵa tegin shyǵarmashylyq kýrstar uıymdastyryldy. Búginde Astana, Almaty, Qostanaı, Rýdnyı, Qaraǵandy qalalarynda 500-den astam bala turaqty túrde bilim alady. Mańǵystaý óńirinde de júıeli jumys jolǵa qoıylǵan.
Ortalyqtyń ashylý rásiminde Nurym Nurǵalıev ata-analar men balalardy Bilim kúnimen quttyqtap, izgi lebizin bildirdi.
«Bizdiń maqsatymyz – erekshe bilimdi qajet etetin balalarǵa teń múmkindik berý, olardyń shyǵarmashylyq qabiletin shyńdaýǵa jaǵdaı jasaý, qoǵamda ınklıýzııa mádenıetin keńinen nasıhattaý», dedi ol.
Sonymen qatar merekelik sharada estrada ánshisi Kenjebek Nurdoldaı ásem ánimen erekshe balalarǵa shabyt syılady.
Qazirgi tańda «Balalar ınklıýzıvti akademııasynda» 200-den astam bala oqıdy. Jyl saıyn bul kórsetkish artyp keledi. Jobanyń mańyzdy tusy – balalardy «úıde oqytýdan» tys, qoǵamǵa beıimdeý, qurdastarymen birge damýyna múmkindik berý. Qysqasy, erekshe balalarǵa arnalǵan bul bastama – elimizdegi bilim men mádenıet salasynda ınklıýzııany damytýdaǵy mańyzdy qadam.
Azat ESEN
