«Ata zań – birliktiń negizi» dep atalǵan bul is-sharada oblys ákimi Ǵaýez Nurmuhametov quttyqtaý sóz sóılep, oblystyń damýyna eleýli úles qosyp júrgen birneshe jerlesimizge túrli marapattar tapsyrdy. Olardyń qatarynda memlekettik qyzmetshiler, qoǵam qaıratkerleri jáne óńirdiń órkendeýine qyzmet etip júrgen túrli sala ókilderi bar. Sonymen qatar kópbalaly analar «Altyn alqa» jáne «Kúmis alqa» tósbelgilerimen marapattaldy. Belsendi ári bastamashyl jastar da nazardan tys qalmaı, Ǵ.Nurmuhambetov olarǵa da oblys ákiminiń granttaryn tabystady.
«Ata zańymyz táýelsiz Qazaqstannyń berik quqyqtyq negizin qalap, onyń saıası, ekonomıkalyq jáne qoǵamdyq damý baǵytyn aıqyndap berdi. Osy tarıhı qujattyń arqasynda búginde biz qýatty, turaqty jáne halyqaralyq arenada abyroıy bıik memlekette ómir súrip otyrmyz», dedi oblys basshysy.
Taǵy bir úlken is-shara S.Muqanov atyndaǵy oblystyq ámbebap ǵylymı kitaphanada boldy. Munda «Ata zań – kemel keleshektiń kepili» atty dóńgelek ústel ótti. Onda oblystyq ardagerler uıymynyń múshesi, baılanys salasynyń ardageri Tilek Ábdirahmanov sóılep, Ata zańnyń mańyzy týraly pikirin ortaǵa saldy. Sonyń ishinde 2022 jylǵy Ata zańǵa búkilhalyqtyq referendým arqyly engizilgen ózgeristerdiń biri – Qazaqstannyń jeri men onyń qoınyndaǵy resýrstary, orman, sý qory halyqtiki bolǵanyn atap ótti. Sonymen qatar osy dóńgelek ústelde qalalyq №2 sottyń sýdıasy Anar Mamanova, Ulttyq ulan Akademııasynyń ustazy Natalıa Beloýsova, armıan etno-mádenı ortalyǵy tóraǵasynyń orynbasary Svetlana Malhasıan, Qazaqstan Halyq partııasy oblystyq fılıalynyń tóraǵasy Bolat Qojahmetov, M.Qozybaev atyndaǵy oblystyq ýnıversıtettiń ustazy Marına Ýmrıhına pikirin ortaǵa saldy.
Osyndaı dóńgelek ústel jıynynyń biri oblys ortalyǵyndaǵy Dostyq úıinde «Konstıtýsııa – ádilet pen parasat joly» degen ataýmen ótti. Onda «Qoǵamdyq kelisim» KMM basshysy Kemel Ospanov sóılep, Ata zańymyz Qazaqstanda turatyn túrli etnos ókilderin beıbitshilik, kelisim, tózimdilik jáne zańdy syılaý sııaqty ortaq qundylyqtarmen biriktirip otyrǵanyn jetkizdi.
Qala ortalyǵyndaǵy shyrqalǵan án, dóńgelengen bı «Qazaqstan Konstıtýsııasy» kóshesiniń boıyna jınalǵan jurtshylyqtyń júzinde jylýlyq uıalatty. Úlken de, kishi de merekelik kóńil kúıde boldy. Konsertte ónerpazdar tarapynan quttyqtaýlar, jyly lebizder jıi aıtyldy. Sonymen qatar is-shara barysynda kóńil kóteretin oıyndar, vıktorınalar da oınatylyp, jeńiske jetken jandarǵa syılyqtar tabystaldy.
Soltústik Qazaqstan oblysy
