Sýret: 365info.kz
Aldymen Prezıdent «China National Petroleum Coprporation (SNPC)» dırektorlar keńesiniń tóraǵasy Daı Hoýlıandy qabyldady.
Kezdesý barysynda Prezıdent Qasym-Jomart Toqaev «CNPC» kompanııasy Qazaqstannyń munaı-gaz salasyndaǵy burynnan kele jatqan strategııalyq seriktesi ekenin atap ótti. Memleket basshysy osy jyldar aralyǵynda kompanııamen joǵary deńgeıde yntymaqtastyq ornaǵanyna nazar aýdaryp, elimizdiń energetıka sektory úshin máni zor aýqymdy jobany birge atqarýǵa múddeli ekenin jetkizdi.
Áńgimelesý kezinde kómirsýtegin óndirý jáne óńdeý baǵytyndaǵy strategııalyq bastamalardy júzege asyrý máselesine den qoıyldy. Prezıdent jyldyq qýaty 12 mln tonnaǵa deıin jetetin Shymkent munaı óńdeý zaýytyn jańǵyrtý ózekti ekenin aıtty. Sondaı-aq gaz hımııasy óndirisin damytý perspektıvasyna toqtaldy. Budan bólek, Aqtóbe oblysyndaǵy karbamıd zaýytynyń qurylysy jóninde pikir almasty. Atalǵan kásiporyn elimizdegi agroónerkásip kesheniniń órkendeýine tyń serpin beredi.
Prezıdent Azııa ınfraqurylymdyq ınvestısııalar bankiniń prezıdenti Szın Lısıýnmen kezdesti.
Kezdesýde Qasym-Jomart Toqaev pen Szın Lısıýn Qazaqstan men Azııa ınfraqurylymdyq ınvestısııalar banki (AIIB) arasyndaǵy yntymaqtastyqty damytý perspektıvasy jóninde pikir almasty.
Qazaqstan Prezıdenti AIIB basshysymen 2023 jyldyń mamyr aıynda Sıan qalasynda kezdeskenin, sodan beri ózara qarym-qatynas, ásirese kólik, energetıka jáne densaýlyq saqtaý sekildi basty salalarda tyń serpin alǵanyn atap ótti.
Qasym-Jomart Toqaevtyń aıtýynsha, Qazaqstan bank qyzmetin keńeıtýge, atap aıtqanda, «jasyl» jáne zııatkerlik tehnologııalardy damytý jobalaryn ilgeriletýge arnalǵan aımaqtyq alańǵa aınalýǵa daıyn. Búginde Azııa ınfraqurylymdyq ınvestısııalar banki elimizdegi strategııalyq mánge ıe jobalardyń birqataryna 2 mlrd dollardan astam kólemde qarjy quıdy. Sonyń ishinde Jambyl oblysyndaǵy iri jel elektr stansasy, Jezqazǵan – Qaraǵandy avtokólik joly, Kókshetaý qalasyndaǵy kópsalaly aýrýhana qurylysy bar.
* * *
Qasym-Jomart Toqaev «Huawei Technologies Co. LTD» dırektorlar keńesiniń tóraǵasy Hýa Lıandi qabyldady.
Kezdesý barysynda ozyq tehnologııalar men sıfrlyq sheshimder salasyndaǵy ózara tıimdi yntymaqtastyq perspektıvasy qarastyryldy.
Memleket basshysy «Samuryq-Qazyna» ulttyq ál-aýqat qory men «Huawei» kompanııasy arasynda Innovasııalyq telekommýnıkasııa tehnologııalaryn engizý jáne server ınfraqurylymyn jańǵyrtý týraly strategııalyq kelisimge qol qoıylýyn quptady. Atalǵan ýaǵdalastyq aıasynda sıfrlyq transformasııa men ornyqty damýǵa qatysty birlesken jobalardy júzege asyrý josparlanyp otyr.
Budan bólek, kompanııanyń elimizdegi bilim berý bastamalaryna aıryqsha nazar aýdaryldy. «Huawei» aqparattyq tehnologııa, jasandy ıntellekt jáne úlken derekqordy taldaý salalarynda otandyq bilikti kadrlar daıarlaý isine úles qosýǵa nıetti.
«Huawei» – aqparattyq-kommýnıkasııalyq tehnologııalar men smart-qurylǵylar shyǵaratyn álemdegi iri kompanııalardyń biri. Halyqaralyq korporasııa 170 elde jáne aımaqta 3 mıllıardtan astam paıdalanýshyǵa qyzmet kórsetedi.
* * *
Memleket basshysy «Sany Group Co. Ltd.» korporasııasy dırektorlar keńesiniń tóraǵasy Sıan Venbony qabyldady.
Áńgimelesý barysynda «jasyl» energetıka, mashına jasaý salalarynda birlesken jobalardy iske asyrý, sondaı-aq ǵylymı zertteý jumystary jáne ınnovasııalyq tehnologııalar boıynsha seriktestik ornatý máseleleri talqylandy.
Qasym-Jomart Toqaev «Sany Group» korporasııasynyń Qazaqstan naryǵyndaǵy qyzmetin jandandyrýǵa umtylysyn joǵary baǵalady. Korporasııa elimizde arnaıy tehnıkalardyń ozyq óndirisin jolǵa qoıýǵa nıetti.
Prezıdent Jambyl oblysynda jel generatorlaryna arnalǵan qosalqy bólshekter shyǵaratyn zaýyttyń iske qosylýyn yntymaqtastyqty odan ári tereńdetý jolyndaǵy mańyzdy qadam dep atady.
Sıan Venbo qytaılyq korporasııanyń Qazaqstandaǵy jumys josparyn tanystyrdy. Atap aıtqanda, «Sany Group» kompanııasy qýattylyǵy 1 GVt bolatyn jel elektr stansasyn salyp jatyr.
* * *
Memleket basshysy Beıjińde «China Energy Engineering Group «kompanııasynyń bas dırektory Nı Chjenmen kezdesti.
Qasym-Jomart Toqaev pen Nı Chjen yntymaqtastyqtyń negizgi baǵyttary men birlesken jobalardy damytýdyń jaı-japsaryn talqylady.
Áńgimelesý barysynda elektr jelileri ınfraqurylymyn jańǵyrtý men keńeıtýge, data-ortalyq salýǵa, sondaı-aq qaldyqtardy qaıta óńdeý arqyly elektr qýatyn óndirý jobasyn júzege asyrýǵa qatysty máselelerge nazar aýdaryldy.
«Energy China» kompanııasy Qazaqstannyń soltústigi men ońtústigin jalǵaıtyn turaqty elektr jelileriniń qurylysyn júrgizýge nıet tanytyp otyr. Sondaı-aq jańartylatyn energetıka jobalaryn iske asyrý múmkindigin qarastyrady.
Fortune Global 500 reıtıngine kiretin halyqaralyq iri kompanııa jel, kún jáne jylý qýatyn óndirý, ıadrolyq energetıka, sý únemdeý men gıdroenergetıka salalarynda jumys isteıdi.
* * *
Prezıdent Qytaı ulttyq ıadrolyq ónerkásip korporasııasynyń (CNNC) bas dırektory Shen Iаnfendi qabyldady.
Qasym-Jomart Toqaev Shen Iаnfendi Qytaı atom ónerkásibine 70 jyl tolýymen quttyqtap, bul mereıli meje atalǵan saladaǵy dıalogti odan ári nyǵaıtýǵa jol ashatynyn atap ótti.
Memleket basshysy Tóraǵa Sı Szınpınmen júrgizgen kelissóz barysynda atom ındýstrııasyndaǵy yntymaqtastyqqa aıryqsha mán berilip, mańyzdy ýaǵdalastyqtarǵa qol jetkizilgenin aıtty.
Prezıdent tájirıbesi mol ári tehnologııasy ozyq «CNNC» kompanııasymen birlesken jobalar, sonyń ishinde elimizdegi ekinshi atom elektr stansasynyń qurylysy tabysty júzege asyrylatynyna senim bildirdi.
* * *
Memleket basshysy «CRRC» dırektorlar keńesiniń tóraǵasy Sýn Iýnsaıdy qabyldady.
Áńgimelesý barysynda Qasym-Jomart Toqaev temirjol mashınalaryn jasaýǵa mamandanǵan álemdegi eń iri kásiporyndardyń biri sanalatyn «CRRC» kompanııasymen uzaq jyl boıy jalǵasyp kele jatqan seriktestikti joǵary baǵalady.
Prezıdent 2023 jyldyń qazan aıynda Qytaıǵa jasaǵan saparynan keıin «CRRC» kompanııasymen yqpaldastyq jańa deńgeıge kóterilgenin atap ótti. «Qazaqstan temir joly» ulttyq kompanııasyna 100 magıstraldi jáne 100 manevrli teplovoz jetkizý jóninde mámile jasaldy. Aldaǵy ýaqytta QTJ qosymsha 270 gıbrıdti manevrli teplovoz satyp alýdy josparlap otyr. Memleket basshysy seriktestiktiń kelesi kezeńine ótý mańyzdy ekenine nazar aýdardy. Iаǵnı teplovoz jetkizýmen qatar elimizde lokomotıv óndirisin lokalızasııalaý jáne servıstik ortalyqtar ashý qajet. Prezıdenttiń pikirinshe, bul otandyq mashına jasaý salasyn damytady. Sondaı-aq jańa jumys oryndaryn quryp, temirjol ınfraqurylymyna jedel tehnıkalyq qyzmet kórsetýge múmkindik beredi.
«CRRC» kompanııasy jylyna 2 myńnan asa lokomotıv, 3 myń jolaýshy jáne 50 myń júk vagonyn, sondaı-aq 11 myń qoǵamdyq kólik qurastyryp shyǵarady. Kásiporyn ónimi 100-den asa elge eksporttalady.
