Foto: Mańǵystaý oblysy ákimdigi
Ortalyq Azııadaǵy alǵashqy teńiz akvasharýashylyq jobasy oblys ákimdiginiń bastamasymen, «Organic Fish» JShS qoldaýymen júzege asyrylǵan. Bul shara Qazaqstan teńiz akvasharýashylyǵyn damytýdyń is júzinde júzege asyryla bastaǵanyn kórsetedi.
Sharaǵa Mańǵystaý oblysynyń ákimi Nurdáýlet Qılybaı, QR Aýyl sharýashylyǵy mınıstrligi balyq sharýashylyǵy komıtetiniń tóraǵasy Serik Sermaǵambetov, «Organic Fish» JShS bas dırektory Erjan Amanqosuly, sondaı-aq quryltaıshylar Anna Mádıqyzy, Nurjan Jaqypuly jáne Nurdáýlet Shildebaıuly men sala ardagerleri qatysty.
Úsh úlken tor qorshama men arnaıy ıakor júıesinen turatyn jabdyq Norvegııada jasalyp, Kaspıı teńiziniń tabıǵı jaǵdaıyna beıimdelgen. Quryq portyna jetkizilgen tor qorshamalar sheteldik jáne otandyq mamandardyń kúshimen qurastyrylyp, porttan 20 shaqyrym ońtústiktegi teńiz aýmaǵyna ornatyldy. Ekologııalyq jaǵynan teńizge esh zııany joq.
Kelesi kezeńde tor qorshamalardy balyqpen toltyrý josparlanǵan. Bul – Qazaqstan men Kaspıı teńizi tarıhyndaǵy eń úlken tor qorshamalar: árqaısysynyń aınalymy 120 metr, tereńdigi 25 metr. Alǵashqy eki jylda óndiris kólemin 300-den 1600 tonnaǵa deıin jetkizip, keıin jylyna 5000 tonnaǵa deıin ulǵaıtý kózdelgen. Sonymen qatar 80-nen astam jańa jumys orny ashylady.
Joba tabıǵı taza ortada kaspıı albyrty tuqymdas balyq ósirýge baǵyttalǵan. Balyqtar ekologııalyq taza jemmen qorektenip, teńizdiń tabıǵı jaǵdaıynda ósirilmek. Bul olardyń paıdaly qasıetterin tolyq saqtaýǵa múmkindik beredi.
Teńiz akvasharýashylyǵy jobasy Norvegııa akvakýltýra ınstıtýtynyń kópjyldyq ǵylymı zertteýlerine negizdelip ázirlendi.
Zertteýler barysynda teńiz sýynyń gıdrologııalyq, gıdrofızıkalyq jáne gıdrohımııalyq sıpattamalary, sondaı-aq ýchaskeniń batımetrııasy jan-jaqty zertteldi.
Oblys ákimi Nurdáýlet Qılybaı bul bastama Mańǵystaýdyń agroónerkásiptik áleýetin jańa deńgeıge kóterip, halqymyzdyń ıgiligine qyzmet etetinin atap ótti.
«Búgin biz Mańǵystaý oblysy úshin ǵana emes, búkil Qazaqstan úshin tarıhı máni bar mańyzdy oqıǵanyń kýási bolyp otyrmyz. Elimizde alǵash ret teńiz tor qorshamada balyq ósirý sharýashylyǵy iske qosylyp, Kaspıı teńizine alǵashqy tor qorshamalar túsirilýde. Bul joba – Memleket basshysynyń agroónerkásip keshenin ártaraptandyrý, akvasharýashylyǵyn damytý jónindegi tapsyrmasy aıasynda iske asyrylyp otyr. Bul bastama jańa jumys oryndaryn ashýǵa, jastardy zamanaýı balyq sharýashylyǵy salasyna tartýǵa múmkindik beredi. Bul – Qazaqstan akvasharýashylyǵynyń jańa kezeńi bastalǵanynyń aıqyn belgisi. Bul joba Qazaqstandaǵy teńiz akvasharýashylyǵynyń damýyna jol ashyp qana qoımaı, aımaqtyq ekonomıkalyq ósimge, eksporttyq áleýettiń artýyna jáne ekologııalyq turaqtylyqtyń saqtalýyna zor úles qosady», dedi. Nurdáýlet Qılybaı.
