Aıtýly jıynǵa álemniń 70-ten astam elinen 5 000-nan asa qatysýshy keldi. Atap aıtqanda, brokerler, bankırler, ınvestorlar men ınnovatorlar «Astana» halyqaralyq qarjy ortalyǵynda sıfrlyq ınnovasııalar jóninde pikir almasty. Bıylǵy is-sharanyń taqyryby – «Bolashaqtyń negizin qalaıtyn kapıtal».
Forýmnyń ashylýynda AHQO Basqarýshysy Renat Bekturov qarjy ındýstrııasyndaǵy jańa trendterdi saralap, ásirese sıfrlyq aktıvter men jasandy ıntellektiniń yqpalyna erekshe toqtaldy.
«Jyl saıynǵy «Astana Finance Days» forýmy zamanaýı trendter men syn-qaterlerdi talqylaýǵa, sondaı-aq olardy eńserý joldaryn izdeýge arnalǵan Eýrazııa aýmaǵyndaǵy biregeı alań retinde óz mártebesin dáleldedi. Bıylǵy forýmǵa shamamen 1,5 trln dollar kólemindegi aktıvterdi basqaratyn kompanııa ókilderi qatysyp otyr. Sonymen qatar AFD jańa seriktestikterdi qurýǵa jáne naryq úshin mańyzdy jańalyqtardy jarııalaýǵa arnalǵan platforma retinde jumysyn jalǵastyryp jatyr. Máselen, forým aıasynda steıblkoındardy paıdalaný múmkindikteri, sıfrlyq aktıvter men áleýmettik oblıgasııalar salasyndaǵy jańa lıstıngter, ıslamdyq qarjy sektory boıynsha bastamalar jarııalanady. Bul elimizdiń qarjy naryǵy jańa dáýirge aıaq basqanyn bildiredi. Forým baǵdarlamasy kásibı naryq qatysýshylary úshin de, sıfrlyq qarjyǵa qyzyǵýshylyq tanytatyn keń aýdıtorııa úshin de mazmundy ári qyzyqty bolmaq», dedi Renat Bekturov.
Forýmnyń basty spıkerleriniń biri – áıgili fýtýrolog, kásipker ári «Bank 4.0: Jańa qarjylyq qubylys», «Tehnososıalızm. Teńsizdik, jasandy ıntellekt pen klımattyń ózgerýi qalaı jańa álemdik kún tártibin qalyptastyrady?», «Keńeıtilgen keńistik dáýiri» jáne basqa da álemdik bestsellerlerdiń avtory Brett Kıng boldy.
«Biz jasandy ıntellektiniń paıda bolýynan bastap klımattyq faktorlardyń yqpalyna deıingi orasan zor ózgerister dáýirinde ómir súrip jatyrmyz. Alaıda qazirdiń ózinde álemdik bank salasy sıfrlyq tehnologııalardyń arqasynda tereń transformasııadan ótip jatyr. Máselen, fıntehtiń klıentteri dástúrli bankterge qaraǵanda 50%-ǵa kóp. Avtonomdy jabdyqtaý tizbekteri men «aqyldy» ekonomıkalar múlde jańa banktik ınfraqurylymdy qajet etedi, sondyqtan steıblkoındar men jedel tólem júıeleri qarqyndy damyp keledi. 2050 jyly bank sektory múlde basqasha bolady», dedi Brett Kıng.
Forým barysynda «Commodity Tokenization» atty qanatqaqty joba tanystyryldy. Bul bastama Eýrazııa elderinde aýyl sharýashylyǵy ónimderin sıfrlandyrýdy kózdeıdi. Joba aıasynda blokcheın negizinde astyqty esepke alý, saqtaý, saýdalaý jáne qarjylandyrýdyń biryńǵaı sıfrlyq ekojúıesi qurylady. Bul qadam elimizdiń agroónerkásiptik sektoryna qosymsha ınvestısııa tartýǵa jáne ónimdilikti arttyrýǵa jol ashady.
Forýmnyń taǵy bir sessııasynda «AHQO soty men Halyqaralyq tórelik ortalyǵy: sot tóreliginiń sıfrlyq transformasııasy» taqyryby qozǵaldy. Sarapshylar daý-damaıdy onlaın sheshý júıesiniń damýy máselesin, sondaı-aq sıfrlyq tehnologııalar arqyly ınvestısııalyq kapıtaldy qorǵaý múmkindikterin talqylady. Bul da elimizdiń quqyqtyq ekojúıesin jańa deńgeıge kóteretin mańyzdy qadam sanalady.
Jıyn aıasynda AHQO Akademııasy SDU jáne AlmaU ýnıversıtetterimen birlesip ázirlegen qarjylyq maınor baǵdarlamalaryn tanystyrdy. Maınor – stýdenttiń negizgi mamandyǵyna qosymsha oqıtyn baǵyt, ıaǵnı tolyqqandy ekinshi dıplom emes, biraq qosymsha bilim men daǵdy beredi. Bul – bolashaq mamandardy sıfrlyq ekonomıkaǵa beıimdeýge baǵyttalǵan aıryqsha oqytý ádisi.
«Astana Finance Days 2025» osylaısha qarjy tehnologııalarynyń ortalyǵyna aınalyp qana qoımaı, jańa ıdeıalar men startaptarǵa jol ashyp otyr. Al sarapshylardyń aıtýynsha, osy baǵyttaǵy batyl qadamdar eldiń ǵana emes, tutas óńirdiń damýyna yqpal etpek.
