Prezıdent sý únemdeıtin tehnologııalardy engizý jumysynyń baıaý júrip jatqanyn synǵa aldy.
«Bul jumysqa belgili sheteldik kompanııalardy tartqan jón. Sondaı-aq Qytaıda jasalǵan álemdegi eń ozyq tehnologııalardy satyp alýǵa bolady. Al dıqandar sýdy kóp qajet etetin daqyldardy azaıtpaı otyr. Tipti egin sýarýǵa qajetti sýdy esh ruqsatsyz buryp alý jaıttary jıi kezdesedi. Sonymen birge “qara naryqtaǵy” sýdy zańsyz satý máselesin quqyq qorǵaý organdary jiti baqylaýy qajet», – dedi Memleket basshysy.
Prezıdent Aral teńiziniń mysalyn keltirip, júıeli jumys júrgizilgen jaǵdaıda oń nátıje bolatynyn atap ótti.
«Soltústik Araldy saqtap qaldyq. Aıdyny 36 paıyzǵa ulǵaıyp, sý kólemi eki ese ósti. Tuz mólsheri eki ese azaıdy. Biraq Araldy toltyrý jumystary jalǵasa berýi tıis», – dedi Qasym-Jomart Toqaev.
Kaspıı teńiziniń tartylýy halyqty alańdatqanyn aıtqan Memleket basshysy tıisti shara qoldanbasa, bul asa úlken ekologııalyq apatqa aınalýy múmkin ekenin eskertti.
«Jaqynda Qytaıda ótken ShYU sammıtinde osy máselege arnaıy toqtalyp, Uıym aıasynda Sý máseleleri jónindegi keńes qurýdy usyndym. Kaspıı – bir eldiń ǵana emes, búkil aımaqtyń taǵdyryna qatysy bar másele. Sondyqtan jumylyp áreket etý qajet. Úkimet Kaspııdiń sý resýrstaryn saqtaý týraly memleketaralyq baǵdarlama ázirleýi tıis. Bul qujat Kaspıı mańyndaǵy elderdiń úılesimdi ári jedel qımyldaýyna arqaý bolady», – dedi Prezıdent.
Memleket basshysy sý únemdeý mádenıetin qalyptastyrýdyń mańyzyn erekshe atap ótti.
«Búgin durys sheshim qabyldaı alsaq, erteń onyń ıgiligin keıingi urpaq kóredi. Balalarymyz ben nemerelerimizdiń taǵdyry bizdiń is-áreketimizge tikeleı baılanysty. Biz – óz bolashaǵymyzǵa ózimiz jaýaptymyz. Sýdy únemdeý mádenıetin qalyptastyrý ınstıtýsıonaldyq nemese tehnologııalyq sheshimderden de mańyzdy», – dedi Qasym-Jomart Toqaev.
