Jyldyń basty saıası oqıǵasy – el damýynyń strategııalyq basym baǵyttaryn aıqyndaǵan bıylǵy halyqqa Joldaýda jańa tehnologııalar dáýirindegi mindetter belgilenip, keleli bastamalar kóterildi. Talqylaý alańyna jınalǵan sarapshylar – Májilis depýtattary Ajar Saǵyndyqova, Ekaterına Smolıakova, Qyrǵyz Respýblıkasy elshiliginiń keńesshisi Alım Toqtomambetov, Eýrazııalyq ıntegrasııa ınstıtýty Ǵylymı-teorııalyq taldaý jáne ádisnamalyq qamtamasyz etý departamentiniń basshysy Arman Eshmuratov pen ózge de mamandar Joldaýda aıtylǵan josparlar men bastamalar tóńireginde oıyn ortaǵa saldy.
«Joldaýdyń tujyrymdamalyq qańqasy eldi tereń sıfrlyq transformasııalaý, ekonomıkany ártaraptandyrý men sıfrlandyrý, onyń aýqymdy qurylymdyq jańǵyrtylýy, sondaı-aq ekonomıkalyq jáne saıası reformalardyń berik ǵylymı ári zańnamalyq negizin qurýǵa negizdelgen. Prezıdenttiń eń mańyzdy strategııalyq mindeti – aldaǵy úsh jyl ishinde memleketimizdi tolyqqandy sıfrlyq elge aınaldyrý. Osy baǵytty úılestirý úshin ol Jasandy ıntellekt jáne sıfrlyq damý mınıstrligin qurýdy tapsyrdy. Sonymen qatar Prezıdent eldiń ornyqty áleýmettik-ekonomıkalyq damýyna, makroekonomıkalyq turaqtylyqty qalyptastyrýǵa, ınvestısııalyq saıasat pen bıznes júrgizý sharttaryn qaıta qaraýǵa, sıfrlyq aktıvter ekojúıesin qurýǵa, ónerkásiptik áleýetti tolyq ashýǵa, sondaı-aq qoǵamda zań men tártip ıdeologııasyn jan-jaqty ornyqtyrýǵa baǵyttalǵan birqatar mindetti alǵa qoıdy», dep atap ótti Prezıdenttik ortalyq dırektory Baqytjan Temirbolat.
Qyrǵyz Respýblıkasy elshiliginiń keńesshisi A.Toqtomambetov óz eliniń Qazaqstan basshylyǵy dáıekti túrde júrgizip kele jatqan memlekettik basqarýdy nyǵaıtý men saıası jańǵyrtýǵa, ekonomıkany jáne áleýmettik salany aýqymdy túrlendirýge baǵyttalǵan saıasatty tolyq qoldaıtynyn jetkizdi.
«Biz Qazaqstannyń Ortalyq Azııanyń ekonomıkalyq damý kóshbasshysy bolatynyna kámil senemiz. Qyrǵyzstan men Qazaqstan ekijaqty baılanystar keshenin odan ári keńeıtýge baǵyttalǵan birlesken kúsh-jigerdi naqty túsinedi, osylaısha jetistikterge qol jetkizip, qazirgi syn-qaterler men kedergilerdi birge eńseredi», dep ol oıymen bólisti.
Depýtat A.Saǵyndyqovanyń aıtýynsha, kez kelgen quqyqbuzýshylyq pen zańsyzdyqqa nóldik tózimdilik qaǵıdatyn ustaný – uran emes, naqty is-áreketke baǵyt-baǵdar. Zańǵa qurmet tanytpaı ozyq ult qurý múmkin emes.
«Memleket basshysynyń bıylǵy Joldaýy aldyńǵylardan eldiń órkenıettik damýyna erekshe nazar aýdarýymen erekshelendi. Ásirese Kaspıı máselesi nazarymdy erekshe aýdardy. Teńiz tartylyp barady, ekojúıe buzylyp, taza sýǵa qoljetimdilik azaıyp jatyr. Bul óńirdiń bolashaǵyna qaýip tóndiredi. Biz áreket etýimiz kerek: birlesken monıtorıng ornatyp, ónerkásiptik júktemeni azaıtý, zamanaýı sý paıdalaný tehnologııalaryn engizý, ǵalymdar men jergilikti qaýymdastyqtardy tartý qajet. Prezıdenttiń Kaspıı teńizin qutqarý jónindegi memlekettik baǵdarlama qurý bastamasy – ýaqtyly ári asa mańyzdy qadam», dedi depýtat.
Al E.Smolıakova ózi jıi kóterip júrgen týrızm máselesine bıylǵy Joldaýda da aıryqsha nazar aýdarylǵanyn tilge tıek etti.
«Prezıdenttiń aıtýynsha, týrızm el ekonomıkasynyń jańa ósý núktesine aınalýǵa tıis. Máselen, eger 2020 jyly elge nebári 2 mln týrıst kelgen bolsa, 2024 jyly olardyń sany 15 mln-nan asyp, salanyń jyldyq tabysy 1,2 trln teńgege jetti. Bul týrzım salasynyń ómirsheńdigi men turaqtylyǵyn, sondaı-aq elimizdiń baı mádenı-rýhanı murasyna joǵary qyzyǵýshylyq bar ekenin kórsetedi. Memleket basshysy jergilikti atqarýshy organdarǵa týrızm ınfraqurylymyn damytýǵa erekshe kóńil bólip, osy jumystyń sapasyna jaýapkershilikpen qaraýdy tapsyrdy. Sondyqtan jergilikti jerlerde vızıt-ortalyqtar qurý – kún tártibindegi ózekti másele», dedi ol.
