Kollajdy jasaǵan – Qonysbaı ShEJIMBAI, «EQ»
Baǵdarlama aıasynda árbir stýdentke elimizdegi jeke IT-mektepterde oqýǵa 500 myń teńgege deıingi grant beriledi. Bul jaı ǵana qoldaý emes, bolashaǵy zor salada kásibı mansap qurýǵa naqty múmkindik. «Tech Orda»-nyń maqsaty – sıfrlyq ekonomıka talaptaryna beıimdelgen kýrstar arqyly aqparattyq-kommýnıkasııalyq tehnologııalar salasyndaǵy adamı kapıtaldy damytý. Jyl saıyn myńdaǵan azamat osy múmkindikti paıdalanyp, IT-salasyna qadam basyp keledi.
Bıyl baǵdarlamaǵa 80 IT-mektep akkredıtasııadan ótip, 160 túrli kýrs usyndy. Olardyń qatarynda veb-ázirleý, 3D-dızaın, AR/VR qoldanbalary, operasııalyq júıelerdi ázirleý, kıberqaýipsizdik, IoT (zattar ınterneti), «Big Data», mobıldi qosymshalar men «GameDev» baǵyttary bar. Sonymen qatar «Agile», ónim menedjmenti jáne jasandy ıntellekt salalary basym baǵyt retinde aıqyndalǵan.
«Tech Orda» baǵdarlamasy myńdaǵan azamat úshin shynaıy áleýmettik baspaldaqqa aınaldy. Búginde eldiń ár óńirinen kelgen jastar, tipti bastapqy daıyndyǵy bolmasa da, qysqa merzim ishinde zamanaýı IT-quzyretterdi meńgerip, myqty kompanııalarda jumysqa ornalasyp jatyr. О́tken jyly 35 myńnan astam ótinim qabyldadyq, al arnaıy aǵymdar aıasynda alǵash ret 1000 pedagogti oqyttyq. Bul baǵdarlamanyń keń aýqymda damyp kele jatqanyn, oǵan degen senimniń artqanyn kórsetedi. Kóptegen qatysýshy úshin «Tech Orda» tek mamandyq aýystyrý múmkindigi ǵana emes, eldiń sıfrlyq transformasııasyna úles qosýǵa jasalǵan sanaly qadam boldy», dedi Sıfrlyq damý, ınnovasııalar jáne aeroǵarysh ónerkásibi mınıstri Jasulan Mádıev.
Byltyr baǵdarlama aıasynda 3 465 grant bólindi, onyń 2 465-i negizgi aǵymǵa, al 1 000 grant muǵalimderge arnalǵan arnaıy baǵyttar boıynsha bólindi (onyń 300-i mektep muǵalimderine, 700-i joǵary oqý oryndarynyń oqytýshylaryna).
«Tech Orda» baǵdarlamasyna qatysyp, ómirin túbegeıli ózgertken jandar barshylyq. Máselen, Arýna Sabyr saıasattanýshy mamandyǵy boıynsha bilim alǵan, memlekettik basqarý salasynda magıstratýrany támamdap, birneshe jyl ýnıversıtette qyzmet etken. Degenmen IT salasyn meńgerýge degen yqylasy bárinen basym túsken.
«Buǵan deıin túrli onlaın-kýrstarǵa qatysyp kórdim, biraq kóbin sońyna deıin jetkizbeıtinmin. «Tech Orda» baǵdarlamasy júıeliligimen, mentorlardyń qoldaýymen jáne grant arqyly oqý múmkindigimen baýrap aldy. Qazir meniń ómirim túbegeıli ózgerdi, «backend PHP» -ázirleýshi bolyp jumys isteımin. Bul baǵdarlama bolmasa, mundaı qadamǵa barar ma edim, bilmeımin», deıdi ol.
Búginde Arýna «Meteoro Ai» kompanııasynda eńbek etip, IT salasynda senimdi mansap jolyn jalǵastyryp keledi.
Al Álııa Raqysheva SDU-dyń ekonomıka mamandyǵy boıynsha túlegi. Buǵan deıin «KPMG» kompanııasynda salyq keńesshisi bolyp istegen. Keıin «Data Science» salasyna bet burýdy sheship, «Tech Orda» baǵdarlamasy týraly estıdi.
«Maǵan IT-mektepterdi tańdaý múmkindigi men oqý aqysynyń tolyqtaı grant esebinen jabylatyny unady. «Data Science» boıynsha bilimimdi nyǵaıtyp, ony naqty tájirıbede qoldanýdy qaladym. Eń paıdalysy – qarapaıym derekterdi túsinikti metrıkaǵa jáne bızneske qajetti usynystarǵa aınaldyrýdy úırendim», dedi Álııa.
Baǵdarlama barysynda ol komandalyq jobalarǵa qatysyp, toppen jumys isteý boıynsha tájirıbe jınady. Baǵdarlamany aıaqtaǵan soń, Álııa «Freedom Insurance» kompanııasyna «Junior Data Scientist» retinde jumysqa ornalasty.
Al Baıashat Toqmuhambet KBTU-dyń 4-kýrs stýdenti bolyp júrip, «Tech Orda» týraly dostarynan estigen. Onyń aıtýynsha, baǵdarlamanyń basty artyqshylyǵy – tegin oqý múmkindigi.
«IT-mekteptegi orta bizdi árdaıym yntalandyryp otyrdy. Alty aıdyń sońynda EPAM kompanııasyndaǵy tájirıbege daıyndala bastadym, kóp uzamaı halyqaralyq jobaǵa taǵylymdamadan ótýge qabyldandym. Bul baǵdarlama tek bilim berip qana qoıǵan joq, jańa dostar syılady, ortamdy keńeıtti», deıdi ol.
Qazir Baıashat EPAM «Solutions» kompanııasynda «Junior Software Engineer» qyzmetin atqarady. Onyń «GitHub» platformasynda «shanyrak.kz» pen «Fox Paper» jobalary bar.
Arýna, Álııa jáne Baıashattyń oqıǵalary «Tech Orda» baǵdarlamasynyń kómegimen jańa ómir bastaǵan júzdegen túlektiń qol jetkizgen jetistiginiń bir bóligi ǵana. Baǵdarlama azamattarǵa jańa mamandyq meńgerip, suranysqa ıe jumys tabýǵa, IT salasynda damýǵa jol ashyp otyr. О́ıtkeni «Tech Orda» – jeke IT-mektepterde bilim alýǵa beriletin memlekettik vaýcher. Bul baǵdarlama eń suranysqa ıe IT-baǵyttardy tegin meńgerýge, bar bolǵany 6 aıda jańa mamandyq ıesi atanýǵa, ózińizge yńǵaıly oqý formatyn tańdaýǵa jáne tájirıbeden ótip, jumys tabýǵa jol ashady.
Qazirgi tańda tizimde 79 mektep pen 159 kýrs usynylǵan. Birden bes kýrsqa ótinish berýge bolady, biraq grant tek bir kýrsqa beriledi.
Statıstıkaǵa súıensek, «Tech Orda» túlekteriniń 88%-y jumysqa ornalasqan, olardyń ortasha jalaqysy 505 000 teńgeni quraıdy. Búginde baǵdarlama túlekteri «Kaspi.kz», «Halyk Bank», «KPMG», «Ernst & Young», «Teńizshevroıl», «QazMunaıGaz», «Freedom Finance», «Kcell», «Air Astana», «Kolesa Group» syndy jetekshi kompanııalarda qyzmet atqaryp jatyr.
