Osy kúni zamanaýı mektepte bilim alyp jatqan balalar men ata-analardyń qýanyshtarynda shek joq. Apta sońynda Almalybaq aýylyndaǵy 1500 oryndyq orta mektepte «Ashyq esik» kúni uıymdastyryldy.
«Mundaǵy maqsat – qoǵam ókilderin mekteptiń oqý-tárbıe úderisimen, materıaldyq-tehnıkalyq bazasymen, «Keleshek mektepteri» ulttyq jobasy aıasynda jasalǵan múmkindiktermen tanystyrý, bilim sapasyn arttyrýǵa baǵyttalǵan ashyq dıalog ornatý», deıdi qazaq tili men ádebıeti pániniń muǵalimi Aınur Áshirbaeva.
Almalybaq aýylyndaǵy jańa mekteptiń ashylýyna kýá bolǵan ata-analar da qýanyshymen bólisti.
«Men osy aýyldyń turǵynymyn. Úsh balam osy mektepke barady. Biz mekteptiń ashylýyn uzaq kúttik. Aty aıtyp turǵandaı, shyn máninde keleshektiń mektebi boldy. Synypta barlyq jaǵdaı jasalǵan. Ár synyp taza aýyzsýmen qamtamasyz etilgen. Bastaýysh synyptyń kabınetteri jas erekshelikterine saı jasalǵan. Oryndyqtary, partalary, taqtalary zamanaýı úlgide ornatylǵan. Barlyq balaǵa jeke shkaf berilgen. Ashanasy óte keń. Sport zaldyń bastaýysh pen joǵary synyp oqýshylaryna jeke-jeke jasalǵany, tipti, qýantty. El keleshegi – jas óskinge osyndaı múmkindikterdi syılaǵan Prezıdentimiz Qasym-Jomart Kemelulyna aıtar alǵysymyz sheksiz», deıdi aýyl turǵyny Gúlshat Janǵojaeva aǵynan jarylyp.
Jańa mekteptiń yńǵaıly synyptary men keń zaldary jas urpaqtyń ǵylymǵa, ónerge, sport pen ádebıetke erkin qadam basýyna jol ashatynyn alǵa tartqan mektep dırektorynyń tárbıe isi jónindegi orynbasary Aıjan Meńlihojaeva sáýletti bilim shańyraǵynda oqýshylar dástúrli pánderdi tereń meńgerýmen qatar, aqparattyq tehnologııa, ınjenerııa, bıotehnologııa, robottehnıka, basqa da jetekshi salalarda jan-jaqty bilim alyp, bolashaq mamandyqtaryna alǵashqy qadam jasaıtyndyǵyn aıtty. Osyndaı ıgi bastamalardy qoldaǵan el basshylyǵyna, bilim basqarmasyna alǵysyn bildire kele, bilim men tárbıe ushtasyp, bolashaq bilimdar tulǵalardyń qalyptasýyna negiz bolatyn mektep ujymyna shyǵarmashylyq tabys, oqýshylarǵa shabyt pen sáttilik tiledi.
«Ashyq esik» kúnine qatysqan qoǵamdyq birlestik ókilderi men ata-analar mektep ishin aralap, materıaldyq bazasymen tanysty.
Almaty oblysy
