«En dala» sharýashylyǵy 46 myń gektar egistik jerdi óńdeıdi. Onyń ishinde bıdaı 25 myń gektarǵa, arpa 7 myń gektarǵa egilgen. Sonymen qatar, maıly jáne mal azyqtyq daqyldardyń árqaısysy 4 myń gektar jerge sebilgen. Sút óndirisinen bólek, sharýashylyqta qazaqtyń aqbas tuqymdy 1,5 myń iri qara maly men myńǵa jýyq jylqy bar.
Sharýashylyq basshysy Tımýr Pshenovtyń aıtýynsha, búginge deıin egis alqaptarynyń shamamen 60 paıyzy jınaldy. Bıdaıdyń ónimdiligi gektaryna 16–17 sentnerdi, arpanyń ónimdiligi shamamen 16 sentnerdi qurap otyr. Jınalǵan bıdaıdyń basym bóligi 1 jáne 2-klassqa jatady.
Kezdesýde fermerlerdi mal sharýashylyǵyn qoldaý sharalary qyzyqtyrdy. Aýyl sharýashylyǵy vıse-mınıstri Amanǵalı Berdalınniń aıtýynsha, 1 tamyzdan bastap mal sharýashylyǵynda 50 mlrd teńge kóleminde jyldyq 5 paıyzdyq mólsherlememen jeńildetilgen nesıeleýdiń jańa baǵdarlamasy iske qosyldy.
Jaqyn ýaqytta asyl tuqymdy joǵary ónimdi mal satyp alýǵa baǵyttalǵan «Igilik» baǵdarlamasy bastaý alady. Bul baǵdarlama mal basyn kóbeıtip, genetıkalyq sapany jaqsartyp, salanyń ónimdiligin arttyrýǵa yqpal etedi.
Vıse-premer Mánshúk aýylyndaǵy jańa sút-taýarly fermanyń jumysymen de tanysty. Jobanyń jalpy quny — 6,2 mlrd teńge. Onyń ishinde 4 mlrd teńge «Úlken joba» aıasynda 2,5 paıyzdyq jyldyq mólsherlememen jeńildetilgen nesıe esebinen qarjylandyrylǵan.
Qazirgi ýaqytta fermada 2 myń bas saýyn maly bar. О́ndiristik qýaty jylyna 12 myń tonna nemese táýligine 33 tonna sút óndirýge jetedi. Kásiporynda 70-ten astam jumys orny ashylǵan.
«Aýyl sharýashylyǵy ekonomıkanyń ósý draıverine aınaldy. Onyń JIО́-degi úlesi shamamen 3,9 paıyz bolsa da, tasymaldaý, qoımalaý, qaıta óńdeý jáne azyq-túlik óndirisi esebinen mýltıplıkatıvti áseri áldeqaıda joǵary. Biz qazir jastardy aýylǵa tartý jáne veterınar mamandyǵyn jan-jaqty qoldaý baǵytynda jumys istep jatyrmyz», — dedi sapardy qorytyndylaǵan Serik Jumanǵarın.
