Aldymen 11–14 qyrkúıek aralyǵynda Sankt-Peterbýrgtegi áıgili Chınızellı sırk arenasynda ótken «Bez granıs» IV Halyqaralyq sırk óneri festıvaline 20 elden 170-ten astam ártis qatysqanyn aıta ketý kerek.Festıvalde óner kórsetken Qazaq memlekettik sırkiniń Ádilet Tıkanov jetekshilik etetin «Hassak» toby qalyń kórermen men halyqaralyq qazylar alqasyn tánti etti.
Qatelesýdi keshirmeıtin óner jolynda júrgen otandastarymyz 180 kg tartatyn úsh adamdy mańdaıymen kóterip, kópirli baspaldaqpen alyp ótetin ekvılıbr trıýgimen jurtty tań qaldyrdy. Sırk maıtalmandary qaıtalaı almaı otyrǵan osynaý trıýktiń áli kúnge deıin dúnıejúzinde balamasy joq jáne ol Almaty Circus Festival-de resmı rekord retinde tirkelgen. Sondyqtan «Hassak» toby altyn júldeni daýsyz jeńip aldy. Sonymen qatar, Qazaqstan sırki úshin taǵy bir mártebeli oqıǵa – Qazaq memlekettik sırkiniń dırektory Maqsat Maratbekuly atalmysh festıvalde halyqaralyq qazylar alqasynyń múshesi retinde shaqyrylyp, elimizdiń sırk óneriniń kásibı ókili retinde moıyndalǵany.
Sol kúnderi Máskeýde, Svetnoı býlvardaǵy N.Nıkýlın atyndaǵy sırkte taǵy bir mańyzdy shara – «ARTIST» III Halyqaralyq sırk festıvali ótti. Oǵan álemniń 18 elinen úzdik ónerpazdar qatysty. Qazaqstan atynan Almaty sırkiniń ártisi Taısııa Demıdova óner kórsetti. Onyń esimi álemdik sahnalarda keńinen tanymal. Taısııanyń qorjynynda Monte-Karlodaǵy halyqaralyq festıvaldiń altyn medali, «Idol» festıvaliniń Bas júldesi syndy basqa da bedeldi marapattar bar.
Máskeýde ótken festıvalde Taısııa taǵy da joǵary kásibı deńgeıin dáleldep, qola júldege ıe boldy. Bul jeńis - onyń otandyq sırk ónerindegi ornyn bekemdeı túsi desek te bolady.
Al baıyrǵy Qazaq memlekettik sırki – elimizdiń mádenı salasyndaǵy betke ustar ujymdardyń biri. Sırk ártisteriniń halyqaralyq baıqaýlardaǵy tabysy – Qazaqstan sırk óneriniń joǵary deńgeıde damyp kele jatqanyn, ári qazaqstandyq sırk mektebiniń álem sahnasynda laıyqty oryn alatynyn aıqyndaıdy.
